Bikker cu ley pa resolve problema di sobre poblacion na KIA

ORANJESTAD - Cu articulo 37 di codigo penal, minister di Husticia Andin Bikker kier purba resolve problema di sobre poblacion na e prison di Aruba, conoci como KIA (Korrectie Instituut Aruba). Segun e mandatario, KIA tin atencion extra pasobra e ta sobre pobla. Segun e mandatario, esaki no ta algo nobo pasobra for di tempo cu el a bira minister di Husticia e ta bin ta trece esaki dilanti y for di e tempo ey un KIA amplio ta prioridad.

BONAIRE

El a uza Bonaire como ehempel unda cu   recientemente Bonaire a haya un prison nobo cu un capacidad di 115 cel pa un poblacion di mas of menos 20 mil habitante. Aki na Aruba e capacidad na KIA ta 259 pa 260 cel den comparacion di 115 mil habitante. Segun Minister Bikker, e instituto awor aki ta den un estado hopi deplorable pasobra den ocho aña e ex minister di husticia no a haci mucho na e facilidad aki.

RESOLVE CRIMEN

E bon si ta, cu Aruba tin institutonan cu ta persigui y combati crimen, y nan tin un rate exitoso hopi hopi halto. Esey ta pone cu casi 90% di caso cu ta presenta pa lamentable cu nan ta, nan ta wordo resolvi. Esunnan cu ta haci nan mes culpabel ta haya nan castigo y poni den prison. Den Aruba su Codigo Penal articulo 37 ta bisa, cu ora tin un sobre poblacion di un Instituto Correccional, e ora tin e posibilidad pa pone esunnan cu a haci nan mes culpabel na crimen, un tiki mas tempran den libertad.

CASTIGO

Segun Minister Bikker, ora condena un persona na un straf, normal ta 2/3 parti e ta sinta su castigo y despues ta ser laga den libertad. Den e caso specifico cu ta den publicidad awe, e persona aki mester a ser laga den libertad di e 2/3 parti cu ta fin di december cuminsamento di januari y awor den luna di augustus ta ser laga den libertad. Minister Bikker ta sigui bisa, cu no ta

COMISION

Minister di Husticia ta bay riba e casonan specifico nan aki, pero ta un comision ta duna recomendacion den consideracion cu Ministerio Publico y basa riba esey no ta haya splicacion specifico di cada caso. Loke a sali den publicidad y informacion cu e mandatario a haya, cu e persona a haci su mes culpabel na intento di rape. Awor e articulo 37 no ta papia di distincion riba ki tipo di crimen a wordo cometi pero solamente ta bay na terminonan y obhetivamente ta bisa, kende ta bin na remarca pa haya su libertad. Segun minister Bikker tin un maneho y e ta respeta e maneho aki, cu persona cu a comete tipo di actonan asina manera rape of intento di rape, e no ta bin na remarca pa esaki. Pero e ley mes no ta haci e tipo di distincion den e sistema.

FOUT

Na KIA actualmente tin un reemplazante cu ta traha tipo di e recomendacionnan aki y ta manda nan pa Ministerio Publico. E persona aki no tabata na altura di e maneho y ta un fout interno cu e no a cay riba dje. Aki por mira cu e articulo 37 di e ley mes no ta haci distincion di ki tipo di caso e ta segun Minister Bikker. Buscando un solucion Minister Bikker mesora a tuma contacto cu Ministerio Publico pa otro siman bin un propuesta un concepto di ley pa por cambia e ley pa kita 2/3 parti mescos cu Hulanda.