Minister di Turismo a tene prome encuentro cu CEO nobo di AHATA

ORANJESTAD - Minister di Turismo Dangui Oduber a ricibi bishita oficial di CEO nobo di AHATA señora Tisa La Sorte. Ta corda cu e relacion cu e ultimo CEO Jim Hepple no tabata mucho bon riba varios tereno y AHATA tabatin basta friccion cu gobierno ultimo tempo. Tabata ora cu gobierno anterior a cambia di minister di Turismo, cos a bira un poco mas ‘tolerable’ segun fuentenan di AHATA a bisa NoticiaCla. Awor tin un minister nobo di turismo, y un CEO nobo di AHATA, y lo wak con e relacion aki lo bay.

TOPICONAN

Durante e encuentro aki a combersa riba diferente topico nan riba e area di turismo cu ta di suma importancia pa Aruba. Entre otro, a toca e tema di e “Aruba Certification Program”. E programa di certificacion aki ta pa garantisa un nivel di servicio halto y conocemento esencial di nos isla. E programa su contenido ta basa riba historia di Aruba, turismo, naturalesa, cultura y percura pa servicio excelente, pues un programa sumamente importante pa e nivel di servicio di nos pais y cu sigur ta forma parti di e vision di minister di turismo. Tambe, a toca e tema di Aruba Hospitality & Security Foundation. Ta trata di un comision di seguridad estableci door di AHATA cu e proposito di atende cu e inseguridad den e sector turistico. E mision di e comision aki ta pa constantemente desaroya y facilita inicitativanan pa mantene Aruba safe. Seguridad di nos turistanan di suma importancia pa nos turismo. A combersa tambe riba diferente desaroyonan pendiente pa Aruba. Oduber a sigura di lo bay sigui mantene comunicacion estrecho entre Gobierno di Aruba y AHATA pa asina sigui mehora nos turismo.