Huez Mericano ta autoriza beslag riba Citgo Petroleum

WILMINGTON – Un huez federal a autoriza un compania mericano pa pone beslag riba Citgo Petroleum Corp pa satisface un debe di gobierno Venezolano. E paso aki (manera por a spera), por causa cu mas creditornan por cuminsa actua di mesun forma pa tuma control di e unico propiedad Mericano cu por confisca. Den pasado recien, e compania mericano ConocoPhilips a logra brevemente pa confisca propiedad di Citgo valido pa Aruba, y tambe Corsou y Boneiro. Despues un huez a libera esaki. Na e occasion ey, prome minister di Aruba a bisa cu ‘nos a scapa e biaha aki’ pero tabata conciente cu den futuro, porta nos no tin e mesun suerte ey. E partinan cu a confisca e tempo ey, no a afecta Aruba directamente. Yamada na Citgo Aruba pa un reaccion (ainda) no a duna resultado. Di parti di gobierno di Aruba, prome minister Evelyn Wever a confirma na NoticiaCla diabierna mainta cu ainda gobierno ta purbando pa haya un fecha pa un reunion cu e ehecutivonan pa haya un claridad pa cu e situacion di Aruba. 

CRYSTALLEX INTERNATIONAL CORP

E compania cu den e caso aki a confisca propiedad di CITGO, ta Crystallex International Corp., un compania ‘moribundo’ minero di oro. E ta purbando pa colecta un derecho adkeri pa cu derecho perdi di derecho minero envolviendo gobierno Venezolano. El a usa CITGO, un refineria petrolero pasobra e ta e activo Mericnao mas grandi di e compania Venezolano, cu cual e tin problema.

MAS CREDITORNAN

Tin mas creditornan di Venezuela cu tin wowo riba Citgo, pero Crystallex ta e prome cu a logra haya permiso di huez pa haci e confisca. E decision di huez na fabor di Crystallex ta permitie pa tuma control di accionan di CITGO su compania madre, e prome paso pa cu cbenta di e compania.

PERDE CONTROL

Si Venezuela perde control di CITGO, e por pone un di e unico fuente di entrada petrolero na peliger di Venezuela. Fuera di esey tin 43 otro compania cu tin reclamo legal contra gobierno, y e paso aki ta pone na peliger e posibilidad pa e companianan aki por haya algo di pago di CITGO. Sin control di CITGO, inversionistanan tin miedo cu PDVSA lo tin poco incentivo pa sigui paga nan debe externo. Algo cu nan tin problema pa cumpli cu ne caba.