- Presion di CAFt a pone gobierno kita 16 miyon pa RWZI di e prespuesto
- Presentadora di television Hulandes a tende di su Condecoracion Real mientras cu e ta na Aruba
- Condecoradonan a ricibi nan ‘cinta’ pa nan esfuerso y dedicacion boluntario na pais Aruba
- Conocido presentadora di programa Sinterklaas Journaal mester laga amputa su nanishi
- Cantidad di hende condecora na Corsou ta hopi menos cu Aruba e aña aki
Arubahuis: Critica di studiante no ta aplicable pa henter Hulanda
DEN HAAG – E critica riba situacion di studiantenan na Hulanda relaciona cu nan yegada, manera describi den un matutino awe na Aruba, no ta aplica pa henter Hulanda. Asina Arubahuis a reacciona diahuebs atardi. Segun Arubahuis segun un articulo den e matutino Bon Dia Aruba di 9 augustus cu studiantenan ta mal contento cu opvang na Hulanda. Mester remarca cu e situacion describi den e articulo ta toca Den Haag y no ta aplicabel pa henter Hulanda.
Den e articulo un studiante ta remarca cu nan a keda un anochi so den hotel Ibis. E desicion aki ta basa riba maneho di Ministerio di Enseñansa di Aruba pa hopi aña caba y tin como meta cu e studiante por descansa di e vuelo y pa siguiente dia e por participa na e programa di opvang. Acomodacion sea un camber of cas ta keda responsabilidad di e studiante y su mayornan. Pa es motibo ey Arubahuis a saca aña pasa den e lunanan di october te cu december un serie di articulo den cual ta trata e tematica di busca y regla acomodacion na Hulanda. Esaki pa evita cu e studiante lo mester hospeda innecesariamente den hotel of cerca famia of conoci. Tambe riba e Facebook di Onderwijszaken di Arubahuis a pone e informacion aki. Departamento di Enseñansa na Aruba cu ta otorga e Arubalening tin e deber di informa esnan cu kier un Arubalening cu tin periodonan den cual nan tin cu tene na man mes na dje pa bin na remarca pa haya acomodacion. E periodonan aki ta varia di ciudad pa ciudad. Pesey Arubahuis ta pone un acento riba informacion, pa motibo di falta di informacion nos hobennan no ta yegando Madre Patria debidamente prepara. Tin cu remarca cu e hecho cu nos studiantenanan e aña aki a yega mas laat Hulanda – en comparacion cu e studiantenan di Curaçao y St. Maarten – esaki ta trece cune cu den un marcado di camber satura na Den Haag, ta bira sumamente dificil pa haya un camber. Manera nan ta bisa na Hulandes: wie het eerst komt het eerst maalt!
E situacion pa haya camber na Den Haag no ta facil. Via DUWO Studentenhuisvesting tin un waitinglist hopi largo mes. Pesey e mentor pa Den Haag ta busca ayudo na un makelaarskantoor cu ta Vesting Vastgoed. Pakico Vesting Vastgoed? Pasobra nan tin conocemento di nos studiantenan y ki tipo di camber of acomodacion nan ta prefera. A base di e experencia ey Vesting Vastgoed ta e prome escohencia pa yuda nos studiantenan cu acomodacion na Den Haag y vecindario.
E POC ta duna e studiantenan un OV anonimo unda cu nan por stort cen riba dje pa haci uso di transporte publico den Den Haag. Tur studiante ta haya un Studenten OV kaart, pero esaki ta valido entrante prome di september y NO prome cu e fecha aki. Un otro opcion ta cumpra un bicicleta.
Dia 23 di juli ultimo e mentor pa Den Haag conhuntamente cu miembronan di POC pa Den Haag/Delft y Leiden a tene un anochi di informacion na e studiantenan cu ta bin studia na e tres ciudadnan aki. Durante di e meeting aki mentor John Dirks a enfatisa cu e studiante mester zorg pa e tin un camber prome cu e sali for di Aruba y bin Hulanda. Vivienda ta keda un prioridad hopi importante pa cualkier studiante. Pesey e enfasis aki! E meeting aki ta banda di e anochi di informacion duna pa Arubahuis na luna di juni na un grupo grandi di studiante cu ta bin Hulanda. Di e manera aki Arubahuis ta conciente di su rol den guia di nos studiantenan na Hulanda.
Apesar di tur contratiempo Arubahuis ta haciendo su maximo esfuerso pa yuda e hobennnan pa haya acomodacion y tin tur comprension pa e preocupacion di e mayornan na Aruba.
Conocido presentadora di programa Sinterklaas Journaal mester laga amputa su nanishi
HILVERSUM – E conocido presentadora di television Hulandes, conoci mas pa e presentacion di e noticianan di Sinterklaas, Dieuwertje Blok (66) ta retira di su funcion. Esaki pasobra e mester haci un operacion cu ta cambia su apariencia. E mester laga amputa su nanishi pa evita cu cancer detecta, ta plama mas leu den su curpa. Asina e la informa den un entrevista na e corant Volkskrant. Cu e entrevista, e ta purba prepara hende pa e ‘spanto grandi’ manera e mes ta yama e situacion.
Gobierno Hulandes ta evaluando pa stop su paginanan riba Facebook
DEN HAAG – Tin chens cu gobierno di Hulanda por stop su actividad riba e red social Facebook. Esaki pasobra e compania madre di e compania, esta META, no ta dispuesto pa adapta cierto risico pa loke ta informacion personal di persona. Asina secretario di estado Hulandes Alexandra van Huffelen cu tin e cartera di digitalisacion tambe. Un conseho di ‘Autoriteit Persoonsgegevens’ a confirma den un conseho na e ministerio di Binnenlandse Zaken en Koninkrijkrelaties (BZK) di e risiconan en cuestion y a conseha pa no continua cu nan actividad riba Facebook.
Seleccion di futbol Hulandes PSV tin posibilidad pa titula campeon di Hulanda awe nochi
EINDHOVEN – E seleccion di futbol Hulandes PSV tin posibilidad pa titula campeon di Hulanda awe nochi. Awe nochi (ora di Hulanda) tin e partido entre PSV y Sc Heerenveen. Si nan gana, y Feyenoord no logra haya punto contra Go Ahead Eagles, e seleccion di Peter Bosz no por wordo alcansa mas. Hasta si PSV empata contra Heerenveen y Feyenoord perde di Go Ahead, e titulo ta di e ekipo di Eindhoven. Pa PSV, esaki lo ta e prome titulo nacional desde 2018.
Arubahuis a tene un ‘Ban Topa’ cu studiantenan na Den Haag
DEN HAAG – Arubahuis a tene un Ban Topa diaranzon anochi 24 di April cu studiantenan for di e region di Leiden, Den Haag, Delft y Rotterdam. Esaki a tuma lugar na De Haagse Hogeschool y a conta cu presencia di Minister Plenipotenciario mr. Ady Thijsen, Minister di Finanza y Cultura Xiomara Maduro, Minister di Labor, Integracion y Energia Glenbert Croes y directora di Gabinete di Aruba mr. Joselin Croes. Tambe tabata presente directora di Departamento di Recurso Humano (DRH) Omaira Lares.
Na Hulanda, partidonan formando formando gobierno, kier corta ‘eigen risico’ den cuido medico
DEN HAAG – E partidonan politico cu ta formando gobierno nobo na Hulanda ta deliberando pa haci cambionan drastico den cuido medico, particularmente e suma cu e ciudadano tin cu paga su mes, conoci como ‘eigen risico’, pa e haya e cuido. Nan ta sinti cu e suma actual, 358 euro, ta mucho halto. Y ta pensando pa sea baha esaki na mitar of elimina esaki completamente. E ta un deseo ferviente di e partidonan PVV y BBB. Nan ta kere cu e suma halto di eigen risico ta pone cu hopi ta evita pa haya ayudo medico. E otro dos partidonan VVD y NSC ta mas cauteloso, pasobra si elimina e suma, ta kita e concientisacion cu cuido no ta gratis. E intencion ta pa elimina abuso den cuido medico y ta pone hende pensa dos biaha prome nan bay pa e cuido cu porta ta innecesario. Si elimina e suma, e ta costa e pais 3.6 biyon euro pa aña.
Preocupa cu e nivel di gobernacion, Hulanda ta ofrece Aruba y Corsou curso pa por goberna miho
ORANJESTAD/WILLEMSTAD – Pa fortifica e poder di gobernacion riba e islanan di Reino Hulandes den Caribe, Universidad di Utrecht y de Haagse Hogeschool ta cbay ofrece un estudio parcial di ‘bestuurskunde’ hunto cu universidadnan di Aruba y Corsou. Asina e portal utoday di Hulanda ta raporta. E gabinete ta preocupa cu e gobierno di Corsou, segun secretario di estado Hulandes Van Huffelen. E ta plan tambe cu e minister Hulandes di Enseñansa Dijkgraaf a trata recientemente durante su bishita na Aruba y Corsou.
Follow NoticiaCla
