Ryan Maduro nombra como director general Colegio EPI

ORANJESTAD - Gobierno a scohe Ryan Maduro como e director general pa e scol Educacion Profesional Intermedio (EPI). Minister di Enseñansa Rudy Lampe a confirma diahuebs durante un conferencia di prensa cu despues di a fungi den funcion di management team, e ta bay eherce e funcion como director general. "Ta den su man nos ta pone e futuro di e institucion importante aki, y ta un persona aprecia den e management team" Lampe a bisa. Maduro a haya su master den adult education recientemente, pues segun e mandatario, Maduro ta adecua pa e funcion. A sigura cu e proceso a cana corecto via un solicitud habri y den forma di consensus a dicidi di scoge Maduro den e funcion. 

MADURO

Maduro a gradici Lampe y e comision cu a forma parti di e seleccion. A mustra cu su responsabilidad ta encera e reto pero tambe speransa. "E compromiso tey pa haci nos best no solamente pa Colegio EPI pero pa comunidad di Aruba, caminda como e unico beroepsonderwijs of MBO na Aruba, como un di e scolnan di mas grandi, EPI ta haya un bachi y un luz nobo pa beneficia tur e studiantenan y tambe e docentenan cu ta forma parti di e scol", Maduro a bisa como un reaccion inicial di su posicion nobo.