Minister habri pa cambio den structura di pago pa recoge sushi

ORANJESTAD - Minister ta completamente habri pa cambio den e structura di pago pa recohe sushi door di Serlimar. Asina e mandatario encarga cu medio ambiente y responsable pa e compania Sui Generis a bisa durante un conferencia di prensa diahuebs. Esaki ta inclui cambio di tarifa di pago, manera cu inicialmente a keda sugeri. Un reunion pidi pa fraccion di MEP e luna aki tin cu determina e posibilidadnan aki. Tabata riba peticion di gobierno, cu a para e cobransa di Serlimar di recohe sushi entrante 1 di juli ultimo. E mandatario ta alerta si cu si haci laga cosnan manera cu nan ta aworaki, tambe ta posibel, pero e ora lo mester carga consecuencia si cu contractnan cu ta cera aworaki cu cierto compania manera EcoGas. 

CAMBIO

Segun Oduber, el a duna ordo caba na directiva di Serlimar pa presenta alternativanan riba e structura di pago pa recohe sushi, en espera di e reunion menciona den luna di augustus manera ta programa. Importante segun e mandatario, ta pa yega na un solucion pa desperdicio di sushi na Aruba. "Si e solucion ey nifica cu nos tin cu bay links om manera minister president a bisa, of rechtsom pa haya fondonan, esey lo mester wordo haci", Oduber a bisa. No ta intencion pa ta empeña pa impone e forma manera anuncia pa dia 1 di juli ultimo. E punto ta pa Serlimar logra bira sostenibel.

TARIFA FIHO

Segun e mandatario, si tin cu bay bek pa cobra un solo tarifa fiho, of pa laga WEB cobre, of otro tipo di structura, 'so be it'. E hecho ta si cu tur sindicato, segun e mandatario, tur sindicato ta di acuerdo pa cobra pa e servicio. A toca e parti di e structura segun e filosofia di 'lomba hancho', pero si kier bin cu un tarifa social diferente unda cu djis esnan di menos recurso so no ta paga y gobierno ta subsidia e parti social of ta bin cu un tarifa fiho. Tur cos e mandatario ta habri pa haci e cambionan.  

SIN DESICION

A bisa tambe cu si no kier yega na un desicion 'nobo' y ta scohe pa keda manera cu ta, tambe ta posibel segun e mandatario. "E ora tur loke nos ta haci, ta stop tur contract cu EcoGas, cu EcoTech. Nos no ta cobra si esey ta e deseo, anto e ora nos ta coi e sushi y ta sigui tira nan y nos ta bay na 25 meter riba Parkietenbos (Dump:red)" Oduber a bisa.