Ta investigando neurologo Hulandes na hospital

ORANJESTAD – Tin un investigacion andando aworaki riba un neurologo Hulandes trahando na hospital na Aruba. Informacion cu e portal aki tin ta cu e neurologo aki ta riba un ‘blacklist’ (zwartelijstartsen.nl) na Hulanda culpa di ta faya na integridad y modestia. Segun e portal, na 2017 na Hulanda e medico specialista di fam K lo a ataca un pashent cu a bira victima di malpractica medico, publicamente den media den un forma cu ta fuera di etica y modestia. Como reaccion pa NoticiaCla, minister di Salud Dangui Oduber a bisa cu ta investigando e fuente aki y su confiabilidad. “Banda di esaki hospital tambe ta atendiendo cu e neuroloog en cuestion” Oduber a sigui bisa.

INVESTIGACION

Oduber “ Na momento cu nos a wordo poni na altura di e caso aki logicamente a acerca sr Cilie den su calidad como director medico na hospitaal tocante e caso aki”. El a sigura cu tur medico ta wordo gescreened door di hospital promer cu nan cuminsa traha na Aruba. “ Na e momentonan aki tin un investigacion andando pa verifica e bron y check si enberdad e bron aki ta uno confiable y reconoci na Hulanda” Oduber a continua bisando. “Mas detaye no por duna awor aki mirando cu hospital ta bezig cu nan investigacion” e mandatario a bisa na final.

E CASO

E portal Hulandes a cuestiona actitud di e neurologo, cu e ta duna diagnostico psicologico sin cu e tin autorizacion pa haci tal, na un pashent cu nunca e no a wak. Segun e portal, e neurologo lo a gana su caso den corte debi na amistad cu amigonan di e huez, presidente di e asociacion di medico ta su bisiña. Segun e portal asina cu e relacion aki a keda publica, e presidente a retira mesora. Awor tin un investigacion andando riba e veracidad di e portal y pa wak con ta bay sigui.