Ta sera edificio di DIMAS/DAO atrobe pa holo malo

ORANJESTAD – E edificio di DIMAS (Departamento di Integracion, Maneho y Admision di Stranhero) y tambe DAO( Departament van Arbeid en Onderzoek)  un biaha mas tin cu sera su porta pa algun dia. Esaki NoticiaCla.com a compronde di DOW (Dienst Openbare Werken) cu, hunto cu contratista tin cu bay traha dialuna y diamars riba e problema atrobe di holo malo. “Nan tin cu “elimina e mal holo y purifica e aire den edificio nobo”, DOW a bisa diabierna atardi laat. Como tal tur cita pa e fechanan menciona (dialuna 13 y diamars 14 di october) ta pasa awor pa un siman despues, esta dialuna 20 y diamars 21 di october 2014. Esaki ta conta pa tur cliente cu tin cita confirma pa entrega un peticion pa permiso di estadia temporario na DIMAS, dialuna dia 13 parti mainta y atardi, y diamars 14 di october 2014 parti mainta y atardi nan cita ta ser hala pa e fechanan menciona na e mesun orario.

Tabata no mas cu diahuebs cu NoticiaCla.com a raporta den forma di primicia cu e situacion den e edificio di DIMAS a empeora diahuebs ora cu no menos cu 20 trahadonan a meld AO. Esaki a keda confirma pa e directora di DIMAS Kathy Ruiz-Paskel na NoticiaCla.com diahuebs atardi. Segun Ruiz, e situacion tabata uno dificil, y ainda no tabatin resultado di e testnan di DTI y departamento di higiena. “Ta spera cu pa dialuna esaki lo keda cla, Ruiz a splica NoticiaCla.com. E momento ey a bisa cu DOW tambe tin un ‘plan van aanpak’ den ehecucion. Y ta parse cu DOW a ehecuta nan ‘plan van aanpak un biaha mas’.

Mas prome den siman tambe, NoticiaCla.com a raporta cu un biaha mas trahadonan di DIMAS a wordo afecta pa problema di mal holo, cu a conduci cu un grupo diamars a ‘meld ziek’. Den apenas algo mas cu dos luna den nan edificio nobo, DIMAS, (Departamento di Integracion, Maneho y Admision di Stranhero) a constata atrobe cu e holo malo den gran parti di e edificio ta presente, cu a afecta e trahadonan menciona. Directora di DIMAS, Kathy Ruiz-Paskel a confirma na NoticiaCla.com cu diamars un total di 6 persona a meld ziek atrobe, fuera di e grupo di persona cu ya caba ta na cas for di september cu a bira malo ora cu nan a confronta problema cu holo di pos. NoticiaCla.com tabata presente diamars, y a tuma nota enberdad di e holo malo cu tin den cierto parti di e edificio.

Segun Ruiz, e simptomanan cu nan a sinti ta entre otro rash, dolor di wowo, garganta, cabez etc. E instancianan concerni diamars awor a wordo poni na altura y ta wardando pasonan cu tin cu tuma atrobe. Ruiz no ta descarta cu un biaha mas lo tin cu sera full un hala di e edificio of posiblemente henter e edificio, dependiendo di e resultado di e investigacion. Algun di e personanan cu si ta trahando ainda y cu no a bira malo pa motibo di e holo, pero simplemente no por traha eynan, a wordo ‘re aloca’ otro caminda. Por a haci esey ainda, pasobra ainda tin espacio habri. Pero si esaki sigui, no tin mas caminda pa por re aloca hende. E hecho cu awor tin hende cu vakantie, y tin otronan cu ta malo, e situacion ta duna pa re aloca. .

Na tur, for di tempo cu e personal di tanto DIMAS como dept. di Labor a drenta den e edificio, DTI a bin 4 biaha caba pa midi gas. Diaranson atrobe e team di departamento higienico lo ta presente pa midi e holo. E resultado di e investigacionnan recien no ta riba papel ainda y esun di diaranson, lo dura te fin di siman prome cu por tin e resultado. “Pues lo dura te fin di siman prome cu nos lo tin un indicacion atrobe di con y kico, y si e edificio ta apto pa laga personal aden. Esey tambe lo trece su desisionnan aden.

Por corda con gerencia di DIMAS a haya su mes obliga pa sera e edificio pa un siman, (8 pa 12 di september ultimo) pa por a haci un investigacion rigoroso y haya e problema. Mirando cu tabatin reunionnan cu hulandesnan e momento ey tambe, a kere cu e seramento tabata un ‘smokescreen’ pa por a haci un ‘investigacion’ di trahado. Sinembargo, Ruiz ta splica cu enberdad tabatin un problema. E multidisciplinaire team e di dos siman di september mester a sera e dienstenan e edificio completo. E tabata necesario pa e contratista haya chens pa busca un solucion pa e holo malo cu tabatin den e edificio. E team aki a consisti di entre otro cuerpo di bombero, DTI, Higienische Dienst, SVB, DOW y e contratista hunto cu Dimas y Dao. Nan a duna minister e recomendacion e tempo ey pa sera e edificio, paga tur airco y check e problematica. Despues cu a bin bek, e problema a disparce pa 2 siman y mei. Holonan a bolbe pa cual un biaha mas DIMAS tin e problema.