Wanta conseho atras di gobernador pa soluciona crisis ta un acto condenable

ORANJESTAD – ‘Pa un gobierno lidera pa sr Mike Eman hala un carta di gobernador un banda y sigui busca confrontacion, anto pone operacion di gobierno na peliger ta un acto condenabel. Casi un acto criminal.’ Esaki ta e prome reaccion di lider di partido MEP Evelyn Wever diaranson mainta, riba e asunto di un ley di financiamento cu a wordo trata diamars den Conseho di Minister, pero cual solucion (pasamento di e ley) lo no tabata conoci sino te e siman aki segun Gobierno su declaracion den media local.

Segun Wever, ta awo su partido a bin haya sa di e asunto aki pasobra awo Eman lo kier uza e tactica aki pa purba desacredita e gobernador un poco mas. “Nos a bin ta lamenta esaki tur e dianan aki y ta tempo pa e gobierno aki bira honesto cu e pueblo” Wever a sigui bisa. Tanten cu un minister no por admiti un eror, culpabilidad y eror, e no por saca nos for di e crisis aki. E la pidi Eman pa ta honesto, stop di bringa cu gobernador y otro. Segun Wever, gobernador ta un persona a-politico y nos tin cu respeta esey.

Tabata NoticiaCla cu a trece e informacion cu contrario na e noticianan den medionan local cu gobernador a bin cu e sugerencia aki na gobierno pa e ley for di basta dia caba, te hasta prome cu e crisis mes a cuminsa. Pues no diripiente e siman aki. E conseho di gobernador na gobierno tabata pa resolve –temporalmente- e problema financiero di gobierno. A manda bisa gobierno e tempo ey – y a keda ripiti esaki na varios instante- cu por resolve e asunto cu un ley di financiamento unda cu gobierno por emiti bono y fia placa asina pa paga por lo menos e interes riba debenan externo.