Awor tin 4 area adicional na Aruba nomina como sitio Ramsar

ORANJESTAD - Durante conferencia di Prensa di Gobierno sra. Indra Zaandam di Ministerio di Infrastructura y Medio Ambiente a amplia riba un noticia sumamente importante cu ta regarda nos naturalesa. Esaki ta e nombramento di e 4 sitionan adicional cu lo bin na remarca pa wordo yama sitionan di Ramsar. Na Aruba nos tin 1 sitio di Ramsar cu ta Spaans Lagoen, conforme tratado internacional.

Kico ta Ramsar?

Ramsar ta un colaboracion di palabracion entre paisnan na mundo unda cu ta para keto na e importancia di diferente sitionan cu tin un nivel di bio deversidad halto. Simplemente bisa e ta palabracionnan entre paisnan tocante nos naturalesa y unda cu ta reconoce e aspecto importante di nos naturalesa y su balor natural, cual no tur ora por wordo transforma den balor monetario, sra. Zaandam ta splica.

Na Aruba Departamento di Naturalesa y Medio Ambiente (DNM) conhuntamente cu universidad di Wageningen y Parke Nacional Arikok a traha un ‘beheersplan’ pa e sitio di Spaanslagoen. Bou di liderasgo di DNM a conseha conhuntamente cu Hulanda, pa nomina 4 sitio adicional. E 4 sitionan ta te cu aworaki Bubali Plas, Isla di Oro/Mangel Halto, Rifnan na Oranjestad y Rifnan na San Nicolas.

Dicon e areanan aki?

E areanan aki tin nivel di biodiversidad halto, cual kiermen cu e aspectonan cu ta forma e naturalesa cu ta haya na e sitio tin gran balor y ta engrandese Aruba. E siguiente pasonan cu a wordo tuma aworaki ta, cu e 4 sitionan aki cu a cumpli cu e criterianan di Ramsar, lo traha un Ramsar Information Sheet (RIS), cu ta discribi un tiki mas detaya kico ta e aspecto di e areanan.

Si tur cos bay bon, den corto tempo lo tin 4 sitio di Ramsar adicional y esaki lo profila Aruba positivamente riba un plataforma internacional. Algo importante pa trece dilanti ta cu tin mas areanan pa wordo protegi conforme sugerencia di NGOs y DNM. Locual ta positivo tambe ta cu ta canando dos caminda na mes momento. Spaans Lagoen cu a wordo apunta como sitio Ramsar na 1980 y a wordo proteha conforme nos leynan local na 2017, aworaki ta canando e proceso aki tambe paralelo. Pues nos tin reconocemento na plataforma internacional, pero nos mes conforme nos leynan local tambe ta protehando e sitionan aki cual ta positivo.