Gobierno y de Veer a keda cla cu otro tereno pa Cinemas

ORANJESTAD – De Veer Chain Theatres a haya un otro opcion pa tereno pa traha nan edificio nobo di cine na Palm Beach. Asina minister di infrastructura Otmar Oduber a confirma dialuna na prensa. Ta trata di un tereno cu gobierno a bay di acuerdo, ubica na Sasakiweg dilanti di Pizza Hut. Mes momento Oduber a confirma si, cu e caso den corte cu De Veer Chain Theatres a entama aña pasa contra gobierno, ta ‘bezig ainda’. CEO di MetaCorp, doño di De Veer Chain Theatres a confirma e informacion pa NoticiaCla tambe dialuna atardi.

DECEMBER

Oduber a recorda prensa cu aña pasa december e compania (De Veer Chain Theatres) a ricibi un carta di e mandatario unda cu gobierno actual ta revoca e opcion cu e compania a haya di e gobierno anterior, debi cu e tereno otorga, ta considera como un ‘wetland’ banda di South Beach Mall y como tal no por a keda otorga. “Apesar cu nan (De Veer Chain Theatres) tabata den corte, nos a dirigi e carta aki pa nan. Mes momento si, Oduber a confirma cu a yega na cierto compromiso cu e compania, unda cu gobierno actual lo sigui yuda nan den e proceso pa adkiri un tereno nobo. Un di e opcionnan cu e compania y gobierno a papia ariba, lo tabata kier ta e parkinglot di Hyatt y pa e bira un alternativa pa e compleho di theater. “Pero finalmente nos a logra haya un tereno, cu enberdad De Veer Chain Theatres a haya den opcion recientemente” Oduber a bisa.

CASO CORTE

E hecho cu tin caso den Corte ainda no a stroba gobierno di sigui trata cu e compania. Pero e mandatario a mustra cu esey ta algo cu ta keda na e compania si nan ta revoca nan caso den corte of no. “Gobierno (actual: red) no a lanta e caso ey. Gobierno (actual: red) a fiha un posicion na december, cu tabata hopi cla, unda cu a bisa cu no ta honra e opcion cu tabatin na e momento ey na e wetland a base di e ley di ROP” Oduber a sigui bisa. E mandatario a bisa cu e caso den corte, tin di haber cu un minister anterior cu a actua impugna e ley di ROP. “E decision no tabata cu gobierno no kier un De Veer Theatres, anto tanten cu bo ta den corte, nos no ta dunabo otro tereno”, e mandatario a sigui bisa.

REACCION DE VEER

E compania mientrastanto a confirma e informacion pa NoticiaCla dialuna atardi. “The Cinema a pidi un tereno den erfpacht na Sasakiweg dilanti Pizza Hut y optierecht a wordo otorga pa cu esaki “ Eddie de Veer, CEO di MetaCorp cu ta doño di De Veer Chain Theatres a bisa NoticiaCla. “Aki a cumpli cu tur condicion di optie y The Cinema ta spera di ricibi e erfpacht pronto conforme reglamento”, de Veer a sigui bisa. Pa loke ta e caso legal, de Veer a confirma cu enberdad e caso ainda ta den corte. “E tereno original dilanti Mc Donalds na Palm Beach pa construccion di e cinema a wordo identifica door di gobierno na aña 2016” de Veer a sigui bisa. Segun e CEO, a pidi esaki den erfpacht na 2016, unda gobierno a otorga e tereno den optierecht y na unda The Cinema a cumpli cu tur rekerimento di e optie. “ Gobierno no a pasa e tereno den erfpacht causando un conflicto legal y e caso ainda ta den corte” de Veer a finaliza bisando .