Oduber: Situacion actual di trafico ta un dolor cu mester pasa aden

ORANJESTAD – Tin hopi critica di trabou di construccion andando tur rond di Aruba, primordialmente den centro di ciudad y cercania. Mayoria di dje ta relaciona cu e trabaonan di Watty Vos Boulevard, y awor cu varios otro tipo di construccion, e percepcion ta cu Oranjestad ta completamente habri. “Berdad ta cu tin trabou basta grandi tumando lugar” Otmar Oduber, minister di infrastructura a confirma pa NoticiaCla.com. Algo cu ta un dolor cu nos tin cu pasa aden segun e mandatario. Pero lo haci tur posibel pa minimalisa e dolor di cabez ey.

CONECTIVIDAD

E ta referi na e conectividad cu ta tumando lugar pa Watty Vos Boulevard. Y e mandatario a bisa cu cos lo bira ‘mas pio’ ainda den sentido cu awor tin cu bay conecta tur e camindanan nobo cu e camindanan principal. Pero lo trata na minimalisa e congestionamento dunado pueblo ruta alternativa mientrastanto. “Pero e ta un dolor cu nos tin cu pasa aden” e mandatario a bisa.

TRAFICO

Ademas Oduber a admiti cu pa e trafico, bo ta bay haya varios congestionamento. “Enberdad nos trabou ta pa hacie menos doloroso pa e usuarionan di nos camindanan, pa evita e congestionan cu ta mira cada bez” Oduber a bisa. Pa colmo, e mandatario a bisa cu e trabaonan ta bay ta birando mas den e sentido cu bo tin cu bay conecta tur e camindanan cu a wordo traha, pero cu awor tin cu bay cruza e diferente camindanan principal caminda cu e rotondenan tin cu bin. Entre nan tin e rotonde di Tanki Leendert, Ponton, Cruzada Fatum, y Sero Patrishi . “Bo ta bay haya bo cada rato cu mas congestionamento. Pero mes momento Oduber ta mustra cu via prensa, ta purba duna informacion pa ilustra kico ta pasando pa nos comunidad ta na altura di cua ta e camindanan alternativa pa tuma, pasobra e ta un dolor cu nos tin cu pasa door di dje”.