Croes: Caso di maltrato cu resultado fatal ta inaceptable!

ORANJESTAD – Loke a pasa cu e señora (Anuska Tromp) cu a fayece marduga a consecuencia fatal, ta inaceptable y intragabel, segun minister di Asuntonan Social y Labor Glenbert Croes. Y a anuncia cu gobierno lo reuni cu varios instancia diahuebs awor pa wak kico mas por haci pa remedia e situacion social cu tin na Aruba. Asina el a bisa durante un conferencia di prensa dialuna. Segun e mandatario, refiriendo na e problema social aki, aunke cu gobierno ta trahando duro pa remedia e situacion social na Aruba, e no ta suficiente. Y pesey kier reuni diahuebs awor.

CRISIS SOCIAL

Segun Croes for di momento cu a declara e crisis social door di sucesonan manera caso di Rishandroh y Roshendrick, esaki toch no a calma e situacion y esaki no a bira menos. “Nos ta trahando duro pa atende cu e problemanan social, mehora e problema social” Croes a bisa. “Pero e realidad ta cu casonan cu loke a pasa marduga, ta bisabo cu nos por ta trahando duro, pero loke nos ta haciendo, no ta suficiente” Croes a continua bisando. A mustra cu porta no por impedi tur caso unda cu cos ta bay fo’i man. “Pero e realidad ta cu nos tin cu puntra nos mes como refleccion, cu loke nos ta haciendo, ta suficiente”.

REUNION PA HACI MAS

Segun Croes no obstante con duro ta trahando, esey no ta suficiente. Y pesey Croes a pidi cooperacion di diferente minister pa un reunion cu el a convoca pa diahuebs awor, unda cu minister presidente y varios otro minister hunto cu departamentonan concerni, lo bin hunto pa wak kico mas por haci pa alivia e presion di e problemanan social na Aruba. E problemanan ta asina grandi segun Croes, cu resolve e problemanan grave na Aruba, ta imposibel.