OM: Roy C acusa di maltrato pisa cu morto como consecuencia

ORANJESTAD - Maltrato pisa cu morto como consecuencia ta e cargo cu ta sospecha e homber Roy C a haya impone riba dje, despues cu a presenta e homber awe mainta dilanti autoridad. Asina vocero di ministerio publico Ann Angela a confirma pa NoticiaCla dialuna merdia. E homber ta sospecha di a maltrata e victima Anuska Tromp un dia anterior (diadomingo) di tal forma, cu el a fayece. Autopsia tin cu determina exactamente kico e causa oficial ta. Awe mainta ora cu Angela a confirma e detencion, no por a bisa ainda kico e cargo lo a bira. Pero Unabez cu a ‘leid e sospechoso voor’, y a tende tur cos, a opta pa e cargo ey. No ta conoci ainda kico e castigo pa un cargo asina ta.

E CASO

Awe mainta NoticiaCla a raporta caba cu e homber Roy C. tabata sospecha di a agredi su pareha A. Tromp cu resultado fatal, y cu el a keda deteni ayera nochi. Pero e cargo exacto pa cual e ta deteni, no tabata conoci ainda pasobra esey no a keda determina ainda. Asina vocero di Ministerio Publico Ann Angela a bisa NoticiaCla dialuna mainta. "E sospecho lo wordo formula manera e investigacion cana  y e elementonan di prueba cay na nan lugar". Segun Angela, C. a keda deteni na ayera nochi na su apartamento na Pos Abou. Pa loke ta e señora, el a wordo hiba diadomingo prome cu merdia pa hospital, cu sla na su cabez y a bin fayece awe marduga. E causa exacto di e morto tin cu wordo determina a base di e autopsia cu tin cu tuma lugar ainda, pero pa cual no tin fecha ainda. Pa esaki, a confisca e curpa di e señora. E caso lamentable a tuma mas probablemente den oranan di diadomingo mainta mirando cu ta prome cu merdia e señora a wordo hiba hospital.

E VICTIMA

Informacion cu e portal aki a logra compila, ta mustra cu e victima Anuska tabata un persona fuerte, cu a sa di lucha cu su malesa di diabetisch, semper alegre. E tabata gusta topa su amigonan diabierna atardi na Djiespie y pa hopi aña a yega di traha na restaurant Kowloon, unda cu clientenan y amigonan a bisa cu semper e tabata yuda cu un sonrisa riba su cara. NOTA: E potret ta di e victima Anuska Tromp.