Problema tecnico tin Welcome Rotonde di Airport sin luz

ORANJESTAD – E palonan di luz di e Welcome Rotonde na aeropuerto lo keda ‘bashi’ un tempo mas. Segun Departamento di Obra Publico (DOW), nan a informa cu tin problema cu e sistema di luz. “ Ta asina cu e piesanan di e sistema di lus di bandera ta den bestelling. Ora cu esaki yega, e lo wordo drecha di biaha” e mensahe di DOW tabata riba nan pagina di Facebook. No a bisa si cuanto tempo esaki lo dura.

POCO LUZ

Ta conoci cu tin basta critica riba e aspecto di iluminacion na e rotonde, for di dia cu a inaugura esaki na September di 2013 (23 di September). Hopi ta haye hopi scur pa un rotonde, mientras cu e siman aki ainda tabatin critica den medionan di prensa riba e sistema di sortia riba e rotonde. Te hasta un accidente fatal a tuma lugar riba e rotonde, aunke cu e rotonde mes (e situacion di trafico) tabata e causa, sino cu e chauffeur a haya un atake di epilepsia y pega riba e rotonde. A compronde di director di DOW algun tempo pasa, esta Marlon Croes, cu lo ta trahando riba e problema di luz.

ROTONDE

E rotonde a keda inaugura dia 23 di September 2013 durante gabinete anterior, y tabata pa mustra ‘e union entre bishitante y tur cu ta biba nos isla’, pa medio di ubica un cantidad grandi di bandera riba e rotonde. Problema rapidamente a bira e biento cu a pone cu cada 4 luna mester reemplaza e banderanan pa motibo di desgaste di e bandera. Algun tempo a order bandera robez cu a pone cu pa basta tempo no tabatin bandera riba e rotonde, haciendo esaki basta ‘sunu’.