AHATA a recorda su miembronan cu e ley di All Inclusive a drenta na vigor

ORANJESTAD – Presidente di Aruba Hotel & Tourism Association (AHATA) Tisa LaSorte a recorda tur miembro diabierna cu e ley nobo di All Inclusive a drenta na vigor recientemente, pa via di un carta diabierna. Manera por corda, AHATA tabata un di e instancianan cu a bringa gobierno fuertemente e tempo ey na 2016, unda cu a bin un bataya di aviso di cada banda. Na final, e ley a pasa toch, no obstante e obhecion di AHATA.  Un di e impactonan mas grandi di e cambionan awor ta entre otro cu 40% di tur camber di hotel na Aruba ta permiti pa bira ‘All Inclusive’. Hotelnan cu no ta all-inclusive, por ofrece un average di no mas cu 20% di nan cambernan como all inclusive pa aña. Tambe cu tur otro propiedad cu kier y ta y ta huur camber pa hospedaje, awor cu e ley aki mester di un permit valido. Algo cu antes no tabata necesario.

E LEY

E ley cu a keda trata na 2016, a drenta na vigor dia 1 di juli 2018, despues cu gobierno actual a activa esaki. Segun presidente di AHATA Tisa LaSorte, no tabatin ningun cobertura of anuncio publico di e introduccion aki.

INTERPRETACION

Fuera di loke ya a keda menciona, tur acomodacion All Inclusive por wordo ofreci solamente cu un licencia specifico, cu excepcion den caso di 10 of mas camber cu ta participa den un evento of conferencia. A defini acomodacion di hotel como un propiedad cu tin posibilidad pa aloha 10 of mas hende bou di pago, pa un periodo menos di 90 dia. Un otro tipo di acomodacion ta wordo describi como un lugar cu capacidad te cu 9 persona, cu ta huur e facilidad pa menos cu 90 dia. Pa loke ta e concepto di All Inclusive, a describi esey como fuera di e parti di hospedaje, cu por ofrece cuminda y bebida no alcoholico contra pago.

PERMISO

Pa loke ta e permisonan necesario, esnan cu ta opera un hotel, mester tin permiso (cu ta inclui esun di benta di alcohol). Esun di All Inclusive ta rekeri permiso pa huur camber all inclusive dentro di e limite di e permiso. Tanto minister di salud como esun di turismo mester duna permiso. Den e caso aki na Aruba awor, esey ta e mesun minister. Tempo cu a traha e ley, esey no tabata e caso.

MINISTER

Tur permiso mester wordo duna pa e minister di turismo so, y tur permiso di all inclusive ta valido pa un periodo di 20 aña. E hotelnan cu ya tabata All Inclusive desde mei 9, 2016 ta garantiza di un permiso All Inclusive. Tambe hotelnan cu na 2015 tabatin un ocupacion di ariba 20% pero cu ta compromete di reduci esaki na no mas cu 20% dentro di tres aña.