Aruba propaganda den video di motociclistanan profesional internacional

ORANJESTAD/ATLANTA – E compania Triumph Motorcycles recientemente a patrocina e atletanan y motociclistanan profesional cu ta haci acrobacia, Nick Brocha and Ernie Vigil pa filma nan ultimo aventura y demostra nan habilidad, na Aruba. E resultado ta un bunita video promocional di 5 minuut, cu ta mustra tur parti di Aruba, mientras cu e dos motociclistanan ta mustra kico nan tin aden. Hopi biaha e loke cu e motorciclistanan ta haci, ta mustra irresponsabel mei mei di trafico local, aunke mester corda cu nan ta acrobatanan (stuntman) profesional. E video mes ta titula “City is my Playground – Aruba.” Varios ciudadano a mira e video ‘online’ caba y a haye un tremendo promocion pa Aruba. E intencion tabata pa crea concientizacion entre e comunidad local di Aruba, aunke no ta bisa exactamente ki tipo di concientisacion. Por nota cu mientras cu e ta mustra algo peligroso, nan tin cooperacion di polis motoriza, cu ta visible tambe den e video. Mester remarca cu esnan cu ta coriendo e motorcicletanan, ta profesional y pa no purba esaki riba caminda publico manera cu e dos atletanan aki a haci.Por mira e video AKI.

ATA

For di CEO di Aruba Tourism Authority Ronella Tjin-Asjoe, NoticiaCla a compronde diabierna atardi cu nan no tabata envolvi den esaki, y tambe a tuma nota di e video e siman aki. Mientras cu nan ta compronde cu lo tin hende cu tin mixed feelings pa cu e contenido peligroso, nan ta conciente cu esaki ta trata di hendenan profesional, y cu di otro banda ta mustra tambe si e bunita bistanan di Aruba. Ademas nan a tuma nota tambe cu esaki a keda regla cu permisonan necesario di autoridad policial.  Den e caso aki Tjin-Asjoe ta aplaudi e iniciativanan asinaki.