Presupuesto 2019 di pais Aruba tampoco lo conta cu CITGO Aruba

ORANJESTAD – Un biaha mas, e presupuesto 2019 di pais Aruba lo no inclui entrada ricibi di e refineria CITGO Aruba, debi na e situacion insigur riba e tema. Asina Minister President Evelyn Wever Croes a bisa NoticiaCla diahuebs. Ademas e punto di salida (acuerdo cu Hulanda) ta cu e deficit riba presupuesto 2019 mester ta 0.5% di e GDP (Producto interno Bruto) di pais Aruba, cu ta mas of menos -25 miyon. “Nos ta logre den e presupuesto aki, sino nos no por a entregue” Wever a sigui bisa. A mustra cu a tarda pa yega na e deficit aki, mirando tur e ehercicionan cu mester a haci al respecto.

ENTREGA ESAKI

E mandatario ta para riba su palabra di siman pasa cu e intencion ta, pa entrega e presupuesto ainda e siman aki na Raad van Advies, cu mester scrutina esaki prome cu por entrega esaki na Parlamento pa dia 1 di September proximo. Raad van Advies ta tuma normalmente 3 siman pa haci nan trabou riba algo asina. Pues si logra entrega esaki e siman aki ainda, tin chens cu e por keda cla prome cu dia 1 di e proximo luna.

CITGO

Manera cu tabata e caso di e presupuesto 2018, tambe riba pregunta di e portal aki, gobierno a dicidi cu ta bolbe laga CITGO Aruba afo, sino e ta bira un presupuesto irrealistico. E incertidumbre di e progreso di CITGO ta dificulta cualkier pronostico financiero pa cu e presupuesto. Pesey a opta pa no inclui cifranan cu gobierno mester ricibi, pasobra si e no materialisa, e presupuesto ta keda manca. A spera cu pa e 2019 cos lo ta diferente pero ainda no tin un claridad riba e futuro di e refineria y su reapertura. Diahuebs NoticiaCla a raporta caba cu gobierno a manda pidi un reunion cu ehecutivonan di e refineria pa asina sa unda nan ta para, pasobra nan no ‘kier ta secuestra te 2020'.