Prome boramento pa petroleo y gas no a duna bon resultado

ORANJESTAD – E prome ‘area’ identifica pa bora y wak si tin petroleo of gas den subsuelo di Aruba, no a duna e indicacion ey. Pues no a duna indicacion di gas of petroleo den e prome pos. Asina prome minister Evelyn Wever Croes a bisa e siman aki. “Manera ta conoci, e prome proef boring a tuma lugar pero unda cu nan a bora, a duna indicacion cu ta un area hopi ‘nobo’, hopi recien, cu no tin mucho ni gas ni petroleo den dje”. Segun Wever, a tuma prueba di loke cu nan a bora na juni y awor ta bay sigui investiga pa bin pa un di dos prueba. E prome periodo pa haci tur esaki ta un aña, aunke cu ya caba a indica na prome minister cu e resultado inicial no ta mucho positivo di e prome pos. Falta 2 pos ainda pa check pa determina finalmente si enberdad tin gas y petroleo of no. Tambe gobierno lo check si ta cumpli cu ley di medio ambiente.