Wever: CITGO no por tin Aruba secuestra te na 2020

ORANJESTAD – Refineria CITGO Aruba no por tin Aruba secuestra te na 2020, prome cu sa kico por haci. Asian Prome Minister di Aruba Evelyn Wever Croes a bisa riba e tema. E ta referi na e incertidumbre riba reapertura di e refineria. Segun contracto cu e gobierno anterior a firma cu e compania, nan tin te dia 2020 pa cumpli, prome cu gobierno por actua. Y den e cuadro ey, Wever a haci e declaracion ey. Pero durante un reunion di conseho di minister diamars ultimo, a dicidi cu ta manda invita e compania pa nan splica nan situacion. “Ta momento pa haya claridad. Nos no ta hayando claridad” Wever a bisa.

CITGO DI MERCA

Wever mesora a aclarea cu CITGO Petroleum, e compania madre di CITGO Aruba, no por opera for di Aruba, manera tabatin rumor y speculacion despues cu Merca a revoca e visa di e CEO di e compania. “Pero esey no tin nada di haci cu Aruba” Wever a sigura prensa diaranson mainta. “No, nan no ta bin Aruba” e mandatario a sigui bisa.

UNDA NOS TA PARA

E mandatario kier sa di e compania na Aruba unda nan ta para cu e contracto. “Nos a manda yama nan aden. Nos a manda un carta y nos a bisa nan cu nos kier sa di boso awor unda nos ta para. Pasobra asina nos no por sigui. Bo no por tin nos secuestra te na 2020 y e ora nos haya sa kico ta kico” Wever a bisa. E fecha di e reunion no ta determina ainda, pero e mandatario ta spera cu esaki lo ta uno pronto.