Premier Eman a priminti sindicatonan cu no ta firma ley nobo di ‘bezoldiging’

ORANJESTAD – Premier Eman a priminti na e 7 sindicato diahuebs atardi cu ‘no ta bay firma e ley di bezoldiging’ pa parlamentario, manera cu e la wordo pasa recientemente. “Nos no ta bay firme” tabata loke Eman a bisa e sindicatonan. Cu esaki, Eman kier men cu no ta bay coopera pa firma esaki na nomber di gobierno. Ainda e tin cu pasa gobernador tambe, cu finalmente tin cu firma pa e bira un ley. Presidente di sindicato SIMAR Maroeschka Cornelie a confirma esaki na NoticiaCla.com, indicando cu Eman asina a purba trankilisa e sindicatonan. Esaki ta un di e puntonan cu a bin dilanti diahuebs durante e reunion cu e sindicatonan. Pero riba su mes e no ta nada nobo, pasobra recientemente fraccion di AVP mes a confirma cu e ley aki, aunke a pasa esaki den parlamento cu mayoria e dia ey, (13 voto), no tabatin e cantidad legal, cu ta 14, pa pasa y hacie un ley.

Por corda cu ora cu e ley aki a pasa, e la crea basta stof den comunidad, sigur serca oposicion y tambe sindicatonan cu a mustra cu minetras cu gobierno ta ‘corta aki y aya, ta duna nan mes mas placa’. Durante e tratamento di e ley, -un iniciativa di tanto parlamentario Chris Dammers como minister Arthur Dowers-, ambos persona a mustra cu e ley tabata necesario pa ‘coregi algun fout haci’ algun anja pasa ora cu ta trata e situacion fiscal di nan. Como tal, tabata momento pa ‘haci e coreccion ey awor’.

Loke a indigna esnan cu a critica, ta e hecho cu e ley a pasa den ‘apenas 6 minuut’. Un ley cu ta yuda parlamentario haya mas beneficio, cu a wordo pasa den un tempo record, segun e critica. Presidente di parlamento Marisol Tromp, sinembargo a purba di splica na NoticiaCla.com den un forma simple cu e ley aki, ta simplemente pa yuda varios parlamentario cu awor no tin cierto beneficio, pa atende cu esaki corectamente. Manera si uno tin problema di curason, otro di djente etc.. Pues nada straño y cu tur tin derecho ariba. Pa partido MEP, esaki a bay di tal forma cu e lider di MEP mesora a manda un carta pa presidente di parlamento, cu e no kier forma parti di esaki y cu e no ta interesa den haya e ‘placa di e beneficio aki’. NoticiaCla.com a compronde cu e ley aworaki ta para, pendiente un revision, y lo wak si ta trece parlamento bek, of si ta mande asina mes despues pa firma. Pero pa awor, premier Eman a priminti cu ‘e ley no ta pasa, pasobra nos no ta bay firme’.