- KVK: Mayoria compania ta pensa cu e scarsedad di trahado lo empeora
- HOH: Ocupacion di cama poco poco ta bek na normalidad na hospital
- Video: Ryçond Santos do Nascimento ta considera su entrada den AVP como un eror
- Mas turista Colombiano ta biahando pa Corsou envez di Aruba den 2024
- Minister a anuncia mando nobo temporal na Cuerpo di bombero
Cas di Aruba ta cla pa ricibi nos studiantenan
DEN HAAG – ‘E preparacionnan pa ricibi e grupo nobo di studiantenan cu ta yega Hulanda diadomingo 5 di augustus benidero ta extenso pero bayendo bon. E team di Cas di Aruba cu ta consisti di empleadonan di Cas di Aruba, e mentornan y diferente miembronan di e Plaatselijke Opvangcommissie (POC) ta cla pa ricibi nos hobennan na Schiphol.’ Esaki Minister Plenipotenciario Guillfred Besaril a bisa na antesala di e yegada di e grupo di 173 studiante for di Aruba. Banda di e grupo aki tin algun studiante cu ya caba ta na Hulanda of lo yega despues.
Departamento di Enseñansa di Cas di Aruba a traha duro e ultimo simannan hunto cu Departamento di Enseñansa di Aruba pa canalisa e yegada di e grupo grandi di studiante na Madre Patria. ‘Pa nos di Cas di Aruba ta importante pa e studiantenan, na e momento cu nan subi avion, ta debidamente informa di con e bida di studiante aki na Hulanda ta. P’esey nos a bai Aruba na Juni ultimo pa informa e studiantenan mas mihor posibel riba kico ta spera una bez nan sali di Schihol. E preparacion aki ta cardinal pa e studiante por cuminsa su estudio lo mas trankil posibel.’ ‘Nos meta como Cas di Aruba ta pa na un manera structural duna guia y informacion na e hobennan cu ta scohe pa bin studia na Hulanda. No unicamente ora cu nan ta cla pa bin studia, pero mas tempran prome cu nan dicidi den ki ramo nan kier bai studia. Escogencia di un estudio ta determinante pa nan futuro profesional. Tambe ta sumamente importante pa bo tene cuenta cu despues di bo estudio, cu e posibilidadnan di trabao na Aruba,’ segun Besaril.
E mandatario a bisa cu un di e problemanan cu e studiante ta enfrenta ta pa inscribi nan mes na un gemeente. Minister Besaril: ‘Tin gemeente caminda ta dura 4 pa 6 siman prome cu bo por inscribi bo mes. Si bo no ta inscribi na un gemeente bo no por entre otro habri un cuenta di banco y bo no por busca docter di cas ni djentista. P’esey nos kier bisa nos hobennan pa mira mas leu cu e ciudadnan conoci pa studia cu ta Amsterdam, Rotterdam, Den Haag y Utrecht. Den otro ciudadnan tin Hogescholen y Universidadnan cu kisas tambe por brinda e mesun tipo di estudio, mientras cu na hopi di e lugarnan aki ta menos dificil pa inscribi bo mes. Como Minister Plenipotenciario mi ta den combersacion cu VNG, cu ta e organisacion cupulo pa tur gemeente na Hulanda, pa purba na acelera e proceso na e gemeentenan cu tin dificultad.
Un topico cu tur aña ta bin dilanti ta e cuestion di vivienda. Akinan e mandatario a bisa cu e studiante mes tin un responsabilidad grandi. ‘Pa haya un camber of otro tipo di vivienda ta sumamente importante pa inscribi bo mes mas pronto cu ta posibel na un di organisacionnan cu ta ofrece cambernan. Por ehempel na Arnhem y Nijmegen, bo mester inscribi na cuminsamento di october di e aña aki pa bin na remarca pa haya un camber otro aña. Pa e ciudadnan conoci pa studia e situacion di vivienda ta aun mas dificil,’ Besaril a sigui elabora.
Preocupa cu e nivel di gobernacion, Hulanda ta ofrece Aruba y Corsou curso pa por goberna miho
ORANJESTAD/WILLEMSTAD – Pa fortifica e poder di gobernacion riba e islanan di Reino Hulandes den Caribe, Universidad di Utrecht y de Haagse Hogeschool ta cbay ofrece un estudio parcial di ‘bestuurskunde’ hunto cu universidadnan di Aruba y Corsou. Asina e portal utoday di Hulanda ta raporta. E gabinete ta preocupa cu e gobierno di Corsou, segun secretario di estado Hulandes Van Huffelen. E ta plan tambe cu e minister Hulandes di Enseñansa Dijkgraaf a trata recientemente durante su bishita na Aruba y Corsou.
Rey Willem-Alexander no ta wak e serie Maxima pa no irita su mes riba e partinan incorecto cu por tin
AMSTERDAM – Rey Willem-Alexander no tin planea pa wak e serie riba su casa, Maxima. Asina e la declara e siman aki, na e portal Shownieuws. E no kier irita su mes riba e partinan ‘incorecto’ di e serie. “Mi a tende cu e ta un serie bunita, bon hinca den otro, pero mi ta bay irita mi mes na e cosnan cu ta incorecto (den e serie)” e Rey a bisa. E serie, titula Maxima, ta riba television Hulandes, desde diasabra. Maxima ta trata e bida di e Reina, te cu su compromise cu Willem-Alexander. Den e serie tin tambe un escena intimo cu e dosnan. E serie a kibra hopi record di television. Maxima mes a laga sa cu ainda e no tabatin tempo pa wak e serie dramatico.
Schiphol ta introduci scanner di seguridad cu ta procesa pasahero mas liher cuminsando na mei
SCHIPHOL -Durante e vacantie di mei proximo (otro luna) aeropuerto di Schiphol ta cuminsa usa scanner di seguridad nobo cu mester agilisa e trafico di persona na e aeropuerto. Schiphol a reemplasa tur e scannernan cu cual pasahero ta keda controla, cambia pa ehemplarnan mas liher. E ehemplarnan nobo tin mester di menos di 3 seconde pa wak si un biahero tin artefactonan prohibi den nan posesion. Tambe door di e tecnologia nobo, tin necesidad di menos listramento. E aeropuerto ta pronostica 10% mas biahero cu aña pasa y ta premira cu nan tin cu procesa minimal 70 mil pasahero diario. Esaki ta cantidadnan mes halto cu den vacantie di zomer. Aunke cu tin e scannernan nobo, no ta nifica necesariamente cu e filanan ta bira mas chikito.
Gobierno Hulandes a anuncia pasonan conkreto despues di disculpa pasado di sclabitud
DEN HAAG - Un areglo di supsidio pa inisiativa sosial ku ta fásilmente aksesibel. Kambio di nòmber grátis pa desendiente di katibu bibá na Hulanda Oropeo i Hulanda Karibense. Mas atenshon na prevenshon di diskriminashon i rasismo. Invershon den herensia kultural. I amplia konosementu di e manera ku pasado di sklabitut tin afekto te ku awor. Esaki ta algun di e pasonan konkreto ku gabinete hulandes a tuma despues di e diskulpa di Gobièrnu pa e pasado di sklabitut. E manera ku ta yena e asina yamá ‘espasio tras di e kòma’ ta un proseso kouteloso ku embolbimentu aktivo di desendientenan. Esaki ta pará den e karta di progreso tokante e programa di pasado di sklabitut ku gabinete hulandes a manda awe pa e parlamento.
Na Hulanda, expertonan a pidi pa mas medida contra brote di sarampi
AMSTERDAM – E instancia similar na DVG na Aruba, pero na Hulanda esta RIVM a instala un Outbreak Management Team (OMT) nobo, manera tempo di Covid, pero e biaha aki pa sarampi (mazelen). OMT ta bisa si cu e situacion no ta agudo, pero si ta conseha e minister di saloud pa tuma medidanan extra. Te awor tin 64 caso di sarampi registra cerca RIVM. E la cuminsa cu un kluster na trahadornan migrante na Limburg. Pero awor ta mustra cu mayoria di casonan di sarampi ta den region di Eindhoven.
Grupo di accion kier blokea un ader principal di Amsterdam riba Dia di Rey
AMSTERDAM – Un grupo di accion ‘Extinction Rebellion (XR)’ kier causa ‘problema’ diasabra dia di Rey na Amsterdam Hulanda, door di blokea un ader principal di e ciudad gandi aki, esta e A10, un biaha mas. E grupo di protesta aki kier pidi Rey Willem-Alexander pa papia contra e financiamento di e industria fosil. E intencion ta pa blokea a caminda for di 12’or di merdia na e ringweg na altura di e ex oficina principal di ING. E grupo kier pa e instituto aki stop di financia e industria di fosil. Si e Rey papia contra e intento di financiamento aki, e grupo lo stop nan accion.
Follow NoticiaCla
