Contesta Gobierno pa CAN : No por baha tarifa di coriente

ORANJESTAD – Tanten cu e handling fee di Valero no baha, no por reduci e tarifa di coriente. Esaki ta e mensahe cu gobierno di Aruba a manda diahuebs merdia, den un carta na Comision Accion Nacional (CAN), segun palabracion haci siman pasa. Despues di e reunion cu gobierno siman pasa, dialuna ultimo CAN a duna gobierno ultimatum te diaranson ultimo, cu despues a keda prolonga te awe, diabierna merdia. Pero minister Otmar Oduber a confirma na NoticiaCla.com diabierna mainta cu for di diahuebs a cumpli cu e ultimatum (aunke gobierno inicialmente no tabata na altura di ningun ultimatum).

E contesta sinembargo, ta uno cu no ta positivo mirando cu a bisa cu e contesta principal, ta cu no por cumpli cu e peticion di revoca e aumento di tarifa di coriente manera pidi. Hunto cu e contesta, a manda un cantidad di documento di tanto Elmar y WEB pa por hustifica e contesta cu nan a duna. “Tanten cu e handling fee di Valero ta existi, e prijs dificilmente lo por varia di loke e ta aworaki conforme ahustacion haci” Oduber a bisa. Mes momento sinembargo, gobierno a manda un carta pa Valero, cu combersacionnan lo continua pa wak si por reduci of elimina e handling fee mas cu ta posibel. Na momento cu esey tuma lugar, lo ahusta e tarifa di coriente” Oduber. Awor ta keda na CAN pa wak kico ta nan siguiente paso. Segun Oduber, no ta na altura cu nan tin cu bin bek na otro.

Comision Accion Nacional a protesta un siman pasa den un forma di manifestacion, cu e meta pa pidi gobierno e.o. pa kita e aumento di tarifa di coriente. Na final a entrega un manifiesto, cu e peticion aki. A reuni despues cu gobierno y a keda di bin bek pa duna un contesta final. E contesta final pues ta cu, tanten e handling fee di Valero keda manera cu e ta, no tin reduccion di tarifa di coriente.