Avion di Southwest for di Aruba a haci aterizahe di emergencia

BALTIMORE – Un avion di Southwest Airlines cu diamars ultimo a sali 3:25pm di Aruba, a haci un aterizahe di emergencia na Baltimore e anochi ey. E capitan a raporta problema cu e flaps di e avion. Un total di 130 pasahero y 5 miembro di tripulacion a baha despues, sin problema, acompaña pa un cantidad di truck di bombero anochi 8:50pm.

EXPERIENCIA

Un pasahero abordo, Neysa Condron, tabata bolbe di un vakantie cu su dos yiu muher ora cu e y otro pasaheronan a realiza cu e avion tabata dal buelta pa 20 minuut, prome cu nan a aterizahe cu tabata planea pa 8’or di anochi. “E piloto a bin bisa nos cu tabatin un problema” Condron a informa e portal di noticia Mericano Baltimore Sun. “E flaps di hala no kier sali. Nos ta den contacto cu e personal na tera. Nos ta purbando di averigua kico pa haci”, e piloto a sigui bisa. Despues di 40 minuut, e piloto a bisa e pasaheronan cu e lo ta un aterizahe duro, pasobra e flaps lo no por ‘slow down’ e velocidad di e avion. Tambe a adverti e pasaheronan cu e tire nan di e avion por rementa debi na e calor (cayente crea pa e rush). A sigui bula rond pa kima gasoline abordo, cu ta un procedura normal. A sigura tur hende cu e tripulacion tabata bon entrena pa tipo di scenario asina, y e avion a ateriza sin problema. NOTA: E potret di e avion ta uno di archivo di e mesun tipo di avion na e aeropuerto unda cu e avion a ateriza diamars.