Oduber na De Sousa: No ta bin sushi di cas na e edificio na Pos Chikito

ORANJESTAD – “No ta bin sushi di cas na e lugar di ex DTI pa wordo procesa”. Asina minister di Medio Ambiente Otmar Oduber a contesta ex parlamentario Desiree de Sousa Croes den un carta diamars. E mandatario a manda un documento di 28 pagina diamars pa de Sousa cu ta contene fuera di e carta, un serie di documento, splicando e concepto cu ta planea pa trece eynan. Pero e base di e carta ta pa sigura y trankilisa de Sousa y su grupo cu recientemente a protesta y entrega un manifiesto na Bestuurskantoor, cu no ta intencion pa e ex edificio di DTI bira un dump nobo, manera cu tin na Parkietenbos.

UPCYCLE CENTER

Segun Oduber, loke ta bin ta un centro di reciclahe, manera cu tin e.o. na Hulanda estilo ‘upcycle center’. Pues no un asina yama ‘afvalsorteercentrum’. Ta bin bakinan den cual ciudananonan por recicla palo, hero y plastic. Ademas ta bay ubica e personal di oficina manera front office y IT (computer) eynan, di tanto Serlimar como Bureau City Inspector. E ta spera cu asina e por trankilisa e grupo aki cu nan preocupacion di algun tempo pasa.