Pastoor Maduro ta fulmina riba Facebook contra miembro Grupo 7

ORANJESTAD – Den loke por wordo considera como un reaccion no usual y sigur no di e forma aki, pastoor Jairo Maduro dialuna a manda un mensahe di video riba su pagina di Facebook contra miembro di e Grupo di 7, Rocky Kelly. Segun e pastoor di Brazil, Kelly den un programa di radio merdia lo a yam’e pa ladron y cu Maduro lo a horta ekipo electronico di Parokia di Brazil.

PALABRANAN FUERTE

Loke a hala atencion ta e palabranan fuerte no usual pa un pastoor, cu Maduro a uza den su video, pa describi Kelly su actuacion. “Bo a yamami pa ladron” Maduro a bisa e.o. den su mensahe di casi 15 minuut. “El a pone bo tril, spantabo, grabatamento den bo rooi, hostinabo?” ta algun di e palabranan fuerte cu e pastoor a uza den su mensahe di video riba su pagina.

HIPOCRITA

E tabata sigura cu e (esta Maduro) no tabata rabia, sino simplemente mester a pone Kelly na su lugar. “Bo por yamami pa ladron, (pero) abo ta un cobarde pasobra na radio so bo por bay. Bo ta un hipocrita” Maduro a sigui bisa, y a yama Kelly pa un cacho cu a PUYA!. “Rocky Kelly mi no ta ladron,si bo kier bisami algo ora bo topami na entierronan bo bisami y no keda manera Cacho cu a puya!, e la pone como un mensahe anterior riba su pagina tambe. A sigui bisa cu e mes, esta Maduro, no ta un Santo pero no por permiti hende haci algo asina, ‘papiando stupidez’.

CLARIFICACION

Maduro a sigura cu ningun momento el a horta ekipo sino cu tur ekipo cu e ta uza 5 aña caba pa transmiti via Telearuba, ta di dje incluso un truck di transmision cu e la cumpra. E ta productor di e programa semanal ‘Dia di Señor” cu ta pasa tur diadomingo na Telearuba. El a sigura tambe cu e tin sponsor cu ta cubri e programa y ta paga e canal di television tur luna. Pues cu no tin necesidad pa yam’e pa ladron.

COMENTARIONAN

Comentario y reaccion tabata hopi riba Facebook y tambe den pueblo. Gran parti di hende tabata di acuerdo cu e forma con Maduro a ataka Kelly, mientras cu otronan no a gusta e forma con Maduro, den calidad di pastoor a usa cierto palabra y no a haye apto. Maduro a bisa tambe cu el a wordo conseha pa no haci’e, pero cu e no por keda keto. Por wak e video AKI.