Hobennan a participa na coding classes

ORANJESTAD – Recientemente un segundo curso di coding a keda presenta especialmente pa hobenan na Aruba. E curso tabata pa hobenan entre 13 cu 17 aña di edad y a tuma lugar di 10.30 di mainta pa 1.00 di merdia. Den e curso aki e hobenan a haña un presentacion tocante e lenguahe di programa, Python, cual a wordo duna door di Leroy Tromp. Ademas, Joseph Winterdal, stagiaire di Gamma cu ta studiando na Hulanda, a duna informacion valioso na e hobenan tocante su estudio di ICT na Fontys, Eindhoven. Rainier Gaari tambe a trese un presentacion dilanti tocante e estudio di ICT na e Universidad di Curacao, cual tabata hopi interesante pa hobenan cu kier bai den e ramo di ICT, pero kier keda den e region Caribe.

IT Manager di Gamma, Desmond Nicholso cu a presenta e clasnan, a trese dilanti un parti tocante Media Design y kiko tur esaki ta encera. E parti di coding tabata den man di Software Developer & Tester di Gamma, Jose de Jesus, cu a siña e muchanan con pa traha cu e lenguahe di programa, HTML. E mainta aki e hobenan por a traha den grupo di 4, riba un website informativo. Cu ayudo di opdrachten, tur grupo a logra traha un website riba nan mes.

Na cabamento di e curso e hobenan a ricibi nan certificado y un ‘goodie bag’ cu diferente regalo di parti Gamma y despues nan por a disfruta di un Subway lunch. Nan por a hiba cas e programa pa sigi code riba un USB y di e manera aki nan por sigi train riba nan habilidadnan den coding.