Posibel medida mas severo contra cierto doñonan di casino

ORANJESTAD – Gobierno di Aruba ta dispuesto pa tuma e medida mas severo contra doñonan di casino cu ta bula pipa pa nan responsabilidadnan pa cu e trahadornan. E mandatario di Labor Glenbert Croes ta referi aki specificamente den e caso aki na e doñonan di Excelsior Casino na Holiday Inn hotel. E operador aki tin cu wak bon kico nan ta haci. Asina minister di Labor Glenbert Croes a bisa dialuna durante un conferencia di prensa. E compania lo a   menaza pa cera nan porta manera cu a sosode na Aura Casino aña pasa y laga e trahadornan desampara. Croes a sigura cu e lo no laga esaki pasa. Riba pregunta di NoticiaCla, pakico no ta djis aplica e ley di proteccion pa e trahadornan, Croes a mustra cu esey ta sosode pero den pasado, gobierno anterior ‘a laga e trahadornan cay’.

RESPONSABILIDAD

“ Nan no a exigi di e doñonan di Aura Casino pa cumpli cu e trahadornan” Croes a bisa riba e parti di reenforsa e leynan existente durante e problema di e casino anterior cu tabatin problema na Barcelo Hotel. E hotel e tempo ey segun Croes, tampoco a cumpli pasobra el a keda sin casino pa tanto tempo sin cu nan a perde nan licencia. Algo cu no a sosode pues. “Si bo ta bay inverti den engrandece bo hotel, duna bo trahadornan den Excelsior Casino un trabou temporal otro caminda, pero laga nan cu un trabou” Croes a bisa. No por ta asina segun Croes, cu ta djis cera casino y habri uno bek sin tene cuenta cu e trahadornan. “Nos por laga e trahadornan cay. Ta problema social bo ta crea den nan bida inmediatamente” Croes a bisa. A mustra cu e compania na Holiday Inn kier bati bancarota. Potret cortesia Hans Ruygt.  

ATRACO ARMA

 E casino aki tabata den noticia negativo na 2015 ora cu el a wordo atraca pa varios persona arma. Ta trata di tres persona fuertemente cu despues a keda deteni na Aruba mes despues di un buskeda intensivo. Durante e atraco 3 tres homber fuertemente arma a drenta e lugar, mara esnan presente den e casino, y bay cu un botin basta grandi.