Minister por lo pronto lo ‘overrule’ management team na DPL

ORANJESTAD – Mientras cu no tin siguranza cu management team ta maneha e asunto di labor corecto na Departamento di Progreso Laboral (DPL), minister di Labor personalmente lo ta encarga cu e asunto ey. Asina e mandatario encarga esta Glenbert Croes a clarifica na NoticiaCla dialuna durante un conferencia di prensa. E mandatario a bisa e portal aki cu den e caso aki, berdad a dicidi di temporalmente bypass management team, riba e aspecto aki. E kier ‘clean up’ y tin bon control prome di e maneho aki, prome cu e pone bek den man di e management team.

RESPONSABILIDAD

E mandatario a subraya cu un management team ta actua na nomber di minister. “Niun management team por tin un responsabilidad of un criterio cu ta bay mas halto cu e poder di e minister” Croes a recorda tur hende. Esey ta nifica cu kico cu e management team haci, si nan wordo apodera pa e minister, ta na nomber di e minister nan ta hacie. E ta argumenta cu ta pasobra na final di dia, esun cu tin cu ‘saca su nek’ ora di responsabiliza su mes na Parlamento pa loke ta pasa na DPL, ta e minister. “Management team por sinta patras dimi, pero ta ami ta esun cu ta duna cuenta na Parlamento. Por lo cual mi ta opta e ora ey pa kita autoridad di management team di DPL pa ami tin e unico autoridad di otorga e declaracionnan laboral”, Croes a bisa, refiriendo na e asunto di ‘ontheffing’. Esaki segun Croes ta ‘pa sigura cu e baina nan cu a tuma lugar den e era di corupcion di gobierno di AVP, cu e practicanan ey wordo elimina’.