Minister Xiomara Ruiz Maduro a reconoce Ito Tromp

Minister Xiomara Ruiz Maduro a reconoce Ito Tromp

Posted on 07/30/2018 2:30 pm AST | Updated on 07/30/2018 2:31 pm AST

ORANJESTAD – Durante un momento ameno den presencia di su familiar- y amistadnan, Minister di Cultura mr. Xiomara Ruiz-Maduro a reconoce señor Gregorio (ITO) Francisco Tromp pa su gran aporte y dedicacion na e desaroyo cultural di nos pais.

E semper gusta maestro di ceremonia Señor Persey Jeand’or a duna inicio na e actividad special aki. Caminda el a trece dilanti un relato chikito di señor Gregorio (Ito) Francisco Tromp, Ito a nace den Arendsraat, pero a lanta na Companashi. El a caba La Salle College, MULO, na 1955 y e mes aña el a cuminsa traha na Singmaster & Breyer, e compania cu a traha nos planta di awa y electricidad. Na 1858 el a drenta den servicio di gobierno y a traha na diferente departamento: Servicio di Informacion, Registracion y Archivo, Administracion di Telefoondienst y Recaudacion di Impuesto. Na 1968 el a drenta servicio di gobierno central y a traha na Departamento di Cultura y Educacion te 1985. Despues cu Hubert Booi a bay Instituto di Cultura, el a bira hefe na Cultura y Educacion. Ora Aruba a haya su Status Aparte na 1986 el a bay traha na Departamento Audiovisual di Biblioteca Nacional te na 1995 ora cu el a baha cu penshon. Na 1963 el a bay studia Interamerican University na Puerto Rico, el a caba na 1965. El a studia Ciencia politico cu maestria den administracion publico. Ademas e tin diploma di Soltura Spaño, Diploma di Type A y Comercial, Steno Hulandes, Ingles, Spaño y el a traha un sistema di steno na Papiamento. El a studia pa productor di programa di television na Radio Nederland Wereldomroep na 1972 y a traha pelicula hunto cu N.O.S. di Hulanda. El a nara un cantidad grandi di produccion cinematografico. Ito ta conoci tambe, hunto cu Eddie Tromp, pa e programa Butishi di Alegria cu a dura 40 aña, 3 luna y 25 aña na Radio Kelkboom. Ademas pa e programa, hunto cu su famia. SesoSport cu a stop na 2005. Ito ta activo ainda den tereno di traduccion y dunamento di les di Papiamento pa Enseñansa pa Empleo. Ito ta condecora den Orden di Andres Bello, tercera clase, di Venezuela y tambe como Ridder in de Orde van Oranje Nassua. E atardi a wordo deleita musicalmente pa e maestro Johnny Scharbaay acompaña pa Susjaira Kerpens y Reno Steba.

Minister Ruiz-Maduro den su discurso a expresa palabranan di danki y pabien na señor Ito Tromp y a expresa e importancia pa duna reconocimento na actornan cu ta parti di nos historia cultural y educativo. E mandatario a pidi nos Señor hopi bendición y salud pa Ito por sigui duna di su parti pa e desaroyo y conservación di nos cultura.

  • Powered by SETAR