Cantidad di morto di trafico ta cuminsa preocupa atrobe

ORANJESTAD – E cantidad di morto den trafico e aña aki ta birando alarmante. Cu e morto tragico di un otro hoben awe marduga, Aruba ta yega na 5 caba, y ainda falta 5 luna. E ta zona poco, pero si compara cu na 2017 tabatin ‘apenas’ 2 morto, e cantidad ta creciendo di forma cu tin hopi hende preocupa. E no ta e caso di algun aña unda cu tabatin p.e. 30 morto den un solo aña, danki Dios, pero den perspectiva e ta hopi.

CANTIDAD ULTIMO AÑANAN

Awe polis a comparti e cifranan di e ultimo 4 añanan, cu ta duna un indicacion cu cos no ta bayendo bon, cu excepcion di un aña. E cantidad mas hopi di ultimo 5 añanan tabata na 2015 cu a registra 12 caso di morto tragico, sigui pa 2016 cu tabatin 10. Na 2014 tabatin 7 morto den trafico, y aña pasa pues ‘solamente’ dos. Ta pone den contexto pasobra cada morto ta uno dimas.

DATONAN CURIOSO

Loke ta mas remarcable ta e datonan curioso cu ta casi ‘relaciona cu otro’. Entre otro cu p.e. mayoria ta ta hobennan masculino cu pa ley, apenas a yega e edad di tin un rijbewijs legalmente y ta esnan cu mas ta muriendo den e accidentenan aki. E ultimo accidente p.e. di dia 12 di juli tabatin dos hoben di 22 aña y awe marduga uno di 19. E ultimo accidente a sosode pa 3.23 am y esun di awe marduga 3.03. Varios di nan ta sea pa velocidad halto unda cu ta perde control mientras cu otronan ta pa motibo di influencia di alcohol. Den e caso di awe mainta, e hoben no tabatin un rijbewijs tampoco.

CONTROL DI POLIS

Polis a anuncia awe cu nan lo tin controlnan ‘pisa’ atrobe e fin di siman aki, y lo no basila pa ‘raspa’ esnan cu viola leynan di trafico. Ultimo temponan e control a aumenta atrobe y por a mira cu ta basta hende ta hayando nan mes den problema cu polis, sea pa a perde nan rijbewijs, nan auto of pior, a keda deteni pa no a cumpli cu e reglanan di trafico basico.