Diesdos ‘polis extraordinario’ nobo pa Warda Costa huramenta

ORANJESTAD – Un total di diesdos ‘polis extraordinario’ a huramenta pa Warda Costa diahuebs mainta pa minister di husticia Dowers a huramenta 12 miembro nobo pa Kustwacht, despues cu nan a slaag pa e curso specialisa pa "Buitengewoon Agent van Politie". Tur awor tin autoridad policial completo pa por actua den cuadro di ley, bou di responsabilidad di Kustwacht. Tambe a huramenta un ex Polis, cu awor ta den funcion na Directie Scheepvaart.

Durante e ceremonia di huramentacion, e mandatario encarga a accentua e importancia di un huramentacion, den cual e miembronan di Kustwacht a priminti cu nan lo cumpli y eherce e funcion na e miho forma posibel. Esey ta nifica cu cada un lo sa di respeta e autoridadnan competente cu ta resorta riba cada un di nan y tambe cu nan lo sa di haci e trabou cu e secresia necesario. A duna cada un di e hobennan aki un splicacion amplio di e trayecto di integridad cu nan a cuminsa aki y cu comunidad ta conta riba nan bon trabou.

E hobennan cu a huramenta como “Buitengewoon Agent van Politie” na Kustwacht ta Gabriel G.G. Solognier, Rodney M. Marugg, Melvin A. Funez, Elton J. Flanegin, Darl R.M. Quandus, Jürgen R.K. Angela, Gerardo R. Boekhoudt, Jearuno V.P. Carlo, Joatham A. Kock, Akyr H. van der Bliek y Roshan R. Wernet. Separa di e hobennan di Kustwacht, tambe a probecha pa huramenta Erwin “Alexander” Henriquez, kende a funciona pa hopi aña den Cuerpo Policial, pero cu awor a bay traha na Directie Scheepvaart, den cual e lo uza su experiencia maritimo den dicho departamento pero cu e autoridad necesario como “Buitengewoon Agent van Politie”.