Medaya di oro pa bolichera di Aruba na CAC 2018

CALI - Aruba a logra su di dos medaya di Oro den e weganan aki. Thashaina Seraus segun e portal deportivo di Aruba 297 Sports, tabata simplemente dominante den e wega individual unda e ta tira sublime cu un averahe riba 250.

HISTORIA

Aruba su nomber ta keda graba den Weganan CAC den e deporte di bowling femenino. Na Veracruz 2014, Kamilah Dammers a logra medaya di Oro mientras ayera na Barranquilla 2018, Thashaina Seraus ta ripiti e racha di victoria pa Aruba unda nos ta mantene e medaya maximo den bowling femenino.

SORPRESA

E medaya di Thashaina Seruas no a bin di sorpresa apesar di a bataya den un elenco cu hungadornan elite den e region Centroamerica y Caribe(58 hungador). E bolichera Thashaina Seraus simplemente ta den bon forma y esey e la bin ta demostra sigur e ultimo tres añanan cu a pasa logrando medaya, premiacion, reconocimento. E aña 2018 te cu awor aki a bay super bon pa Seraus cu a logra medaya di Brons y Plata(hunto cu Kamilah) na e Weganan Suramericano Cochabamba 2018 na Bolivia. Tambe Seraus ta wordo eligi Aruba su Atleta di Aña 2017 cual ta bisa hopi di con su prestacion tabata aña pasa. Den US Open (PWBA) Thashaina a logra un di 21 lugar den 108 hungador profesional di bowling (riba e prome dia e tabata ocupa un di 3 lugar). Den e PWBA Harrisburg Open na Juni ultimo mescos cu ayera diahuebs na Cali den e CAC, Thashaina casi ta tira un wega perfecto di 300 pin(ambos a termina 298). Esaki ta bisa hopi di e bon forma cu actualmente Thashaina Seraus ta aden. Awe diabierna ta sigui e wega di doubles unda Thashaina y Kamilah lo hunga hunto.

Informacion y foto cortesia 297 Sports.