Wever: Minister Blok mester haci mas cu djis pidi despensa

DEN HAAG/ORANJESTAD – E disculpa ofreci di minister Hulandes Stef Blok na Prome Minister di Aruba Evelyn Wever pa declaracionan haci riba e tema multicultural recientemente, no ta suficiente. Wever diahuebs a clarifica esaki pa NoticiaCla, bisando cu el a bisa e mandatario Hulandes cu esaki e kier men cu e mandatario Hulandes tin cu bay traha mas duro pa convence cu su despensa ta drecha e loke el (Blok) a bisa, cu a causa tanto consternacion. E declaracion haci dos siman pasa pa Blok, cu e no conoce ciudadnan multicultural cu por a biba den harmonia cu otro a causa consternacion no na Hulanda so pero te aki na Aruba. E impacto tabata suficiente pa Blok pidi tanto Aruba, Corsou y Surnam (cu el a yama un estado fracasa) pa despensa. Surnam no a acepta e despensa. 

DISCULPA

Wever a bisa diahuebs cu e siman aki Blok a tuma contacto cu ne. E prome mandatario no kier a bay den discusion cu si e palabranan cu Blok a usa ta malo, y kico e (Blok) tabata kier men, kico e (Blok) kier men anto etc. “Mi no kier a bay den un discusion kico e tabata kier men, sino lo nos no sa sali afo” Wever a bisa.

BRUGGENBOUWEN

El a puntra Blok si ainda e ta para tras di su palabranan di e rapport cu e mes (Blok ) a presenta na Tweede Kamer titula Bruggenbouwen na januari di 2004. E rapport a conclui cu na Hulanda mayoria caso di integracion multicultural ta exitoso y cu Blok a sostene esey. Wever a puntra Blok e siman aki si ainda e ta para tras di esaki y Blok a contesta cu si.

ARUBA

Wever a sigura Blok cu Blok tin cu bay mustra mas ainda. “E tin cu haci un tiki mas pa mustra cu ta palabranan (el a uza) cu e no tabata kier. Ora cu Blok a ofrece despensa na Wever, Wever a conteste cu ‘palabra no ta bay kita e daño. Ban mustra cu accion kico ta bay pasa” Wever a bisa. Kico exacto esey ta, ta keda na Blok awor pa demostra, segun Wever.