Wever na fraccion heel: Si stop cobranza Serlimar, mester haya e placa di otro caminda

ORANJESTAD – Parlamento di Aruba (lesa: fraccion heel) tin cu compronde cu si kier stop un entrada pa gobierno un caminda, e mester bin di otro caminda. Sigur den un situacion dificil di pais Aruba actualmente. Premier Evelyn Wever Croes ta referi aki na e ponencia di fraccion di MEP particularmente, cu ta contra cobranza pa recohe sushi, sigur e aña aki. Esey ta nifica cu e entrada programa pa gobierno, lo no tey mas sino te posiblemente januari di otro aña. Pero si ta pa fraccion di MEP (lesa: lider di fraccion Rocco Tjon), e cobranza por wordo cancela atrobe na januari.

PARA COBRANSA

Algun siman atras, riba insistencia di e fraccion geel, gobierno a bay di acuerdo pa stop e cobranza di Serlimar di 1 di juli ultimo pa 1 di januari 2019. Un reunion publico cu mester a tuma lugar despues, a keda cancela pasobra ‘minister’ a contesta e preguntanan caba. Ora cu gobierno a para e cobranza, a bisa despues cu na augustus lo trata e structura di cobranza. Y como tal a pone e reunion pa tuma lugar e ora ey pa discuti e forma ey nobo. Pero fraccion di MEP, si ta posibel, kier elimina e cobranza completamente pues tambe na januari 2019. Problema ta cu si esey sosode, gobierno ta perde un entrada crucial, y tin cu ricibie di un otro forma.

RECHTS OF LINKS

“Si bo tin mester di haya placa (den un situacion dificil) di un manera of otro, bo por pone na cero (pues pa Serlimar no cobra den e caso aki) pero di otro caminda e tin cu bin. Links of rechtsom” Wever a bisa NoticiaCla. Den caso di Serlimar, Wever a bisa e portal aki cu a discuti e situacion cu e fraccion en cuestion y cu como Parlamento, nan por dicidi kico ta haci. Den e caso aki p.e. cu no ta cobra pa recohe sushi. No ta bin cu tarifa, ta cambia ley, pasobra esey ta e responsabilidad di Parlamento. “Pero na e momento si cu nos ta sinta aworaki nan, con nos ta squeeze pa yega na e deficit cu nos a palabra cu Hulanda, e ora bo mester tin otro alternativanan pe. Y esey ta keda algo importante y un punto cu nan ta compronde hopi hopi bon tambe” Wever a bisa. Pues e mensahe di Wever na e fraccion ta cu si kier kita e cobranza, mester busca un alternativa pa haya fondo otro caminda.

IMPORTANCIA DI HAYA E PLACA

Ora cu e portal aki a puntra Wever, con importante e suma aki (den e caso aki e suma cu Serlimar lo mester a cobra pa drenta caha di gobierno) ta, pa caha di gobierno. Y cu si no ricibi e placa via Serlimar, cu mester haye di otro forma, Wever a bisa “hopi importante. Cada florin ta hopi importante” Wever a sigui bisa. Pues cada florin cu gasta y no tabata premira, tin cu sake di otro banda. “Den caso di Serlimar, si ta 5 miyon florin, ta 5 miyon cu tin cu bin di otro caminda. Si ta 10 miyon, ta 10 miyon cu tin cu bin di otro caminda. E ta hopi importante pasobra e situacion financiero di nos pais ta hopi hopi delicado” Wever a bisa.