Hunta di comisario a suspende director di Elmar NV

ORANJESTAD – Director di Elmar Robert Henriquez a keda suspendi awe pa un periodo di 30 dia. Esaki a keda confirma pa e compania mes diahuebs atardi laat. Segun e compania, ta e hunta di comisario di e compania a tuma e decision ey. “E decision no tabata uno facil , pero si uno necesario mirando entre otro e diferente kehonan serio di mal maneho y irregularidadnan den e compania, e kehonan di ‘secuestro’ cu a wordo haci recientemente na Landsrecherche y tambe e intrankilidad cu ta existi pa un tempo caba” e comunicado ta bisa.

INVESTIGACION NECESARIO

Mirando esaki, hunta di comisario a conclui cu un investigacion na e diferente keho y sospechonan ta necesario. E suspension aki ta sirbi tambe como un tipo di ‘koel af periodo’ den cual ta spera di por trece trankilidad bek na Elmar y frena e discusion politico negativo tocante e director y tocante Elmar cu ta tumando lugar. Hunta di comisario mester a interveni pa asina por cumpli cu su responsabilidad manera duna door di statute di Elmar.

Pa loke ta e investigacion na e director suspendi, esaki lo cuminsa de inmediato y lo mester wordo haci cu cautela y prudencia. Pesey mes, den interes di Elmar (y e director mes), hunta di comisario lo abstene su mes di comentario despues di awe y durante henter e proceso di investigacion. E hunta a pidi compression pa cu esaki.