No ta cla ainda con lo reparti gasto pa soluciona problema di huma

ORANJESTAD – Deliberacionnan riba reparticion di gasto pa soluciona e problema di huma na Barcadera no ta cla ainda. Asina minister di Energia, Evelyn Wever a bisa NoticiaCla diahuebs mainta. “Nos a cuminsa cu nan pero nan no ta hopi avansa” Wever a bisa. A mustra cu e prome preocupacion y prioridad ta na busca un solucion pa trata e salud di e trahadornan y molester ora di trabou na waf di Barcadera. “Na momento cu RdA (Refineria di Aruba) keda cla cu ne (e compra di fuel oil diferente y mas caro) nos sa (e ora) cuanto e gastonan adicional ta, y e ora nos por papia cu e demas partidonan” Wever a sigui bisa.

AUMENTO TARIFA AWA Y CORIENTE

Tabata algun siman pasa cu WEB, y Gobierno a tene un conferencia di prensa riba e tema. E momento ey minister di Finanza Xiomara Ruiz a bisa cu e hecho cu WEB tin cu bay realoca fondo pa por remedia e problema di huma (cu ta afecta waf di Barcadera), no ta nifica cu esaki lo resulta den aumento di prijs di awa y coriente. Aki ta unda cu a bin cu e plan y intencion pa e partidonan envolvi (WEB, ASTEC y ATIA) wak con ta yega na un solucion mutuo pa despues gobierno dicidi con pa reparti esaki di un forma mas husto. Posiblidad ta cu e gastonan por wordo asumi entre e tresnan menciona. Pero no ta asina cu ta bay ‘verreken’ e gastonan aki pa pueblo. Pues e informacion cu e gastonan aki extra pa WEB (of e grupo cu tin cu bay paga pe) ta bay nifica un aumento di tarifa di utilidad. A haci mencion di 7 cent di aumento, pero e mandatario a desbarata e idea ey. “Esey no ta berdad” Ruiz a sigura e portal e tempo ey. Pero aworaki ainda no tin un idea con ta bay haci esaki.