Intencion ta pa e siman aki entrega presupuesto 2019 na Raad van Advies

ORANJESTAD – E intencion ta pa gobierno ainda logra entrega presupuesto 2019 na tempo na Parlamento esta 1 di September proximo. Asina premier Wever Croes a sigura NoticiaCla diahuebs mainta. E mesun mainta ey e mandatario a reuni den seno di conseho di minister riba e tema. “Tur cos, tur esfuerzo ta wordo haci pa e (presupuesto) bay Raad van Advies e siman aki pa nan por cuminsa traha riba dje. “Cu e speranza cu e ta yega Parlamento na tempo” Wever a bisa. “Ketobay esey ta e plan” e mandatario a bisa. Di otro banda e ta tene cuenta cu na caminda cierto cosnan por pega.

NORMA NOBO

E mandatario a recorda cu ta pa prome biaha ta trahando cu normanan nobo, cu e tema di personal cu ta un tema bastante complica pa por complica. Den pasado gobiernonan no a logra cumpli cu e fecha y esey a pone cu tabatin retraso serio den e aprobacion di esaki. Algun si a logra entrega esaki na tempo pero no realistico. E gobierno actual mes a logra aproba e presupuesto te na fin di april di e aña aki. Motibo entre otro tabata cu nan no a haya un presupuesto cla pa e otro gobierno anterior. E gobierno anterior a mustra na NoticiaCla cu no tin sentido pa traha un presupuesto si nan no sa kico e maneho di e gobierno nobo lo ta, mirando cu tabata trata di un aña di eleccion y cu net e luna ey tabatin eleccion cu tur su consecuencia. Ora cu gobierno nobo a sinta, a bin un discusion riba cambio di cifra, debenan no conoci cu a pone cu e gobierno mester a delibera e.o. cu Hulanda riba e tema y no haya un KB. Miembronan di e gobierno anterior sinembargo a tilda e gobierno actual di a manipula cu cifra y crea un debe cu no tabatin y asina tira culpa riba gobierno anterior. Gobierno di Hulanda e ora a duna gobierno un extension pa por a keda cla cu tabata maximo 30 di april. Algun dia prome, esaki a keda aproba den Parlamento.

PRESUPUESTO

E regla y ley ta cu e presupuesto mester keda entrega mas tarda 1 di September di e aña anterior. Si esaki no sosode, gobierno ta violando ley di comptabilidad. Pero mes momento tin forma con pa atende cu e problema ey, dunando gobierno e espacio pa usa 40% di e suma di presupuesto anterior, te ora cu e presupuesto keda aproba. Esey ta nifica mas bien cu gastonan structural por wordo haci, pero no por haci ningun gasto extra of inversion planea.