Wever: Kier sa di ARA si personal extra di gobierno anterior tabata legitimo

ORANJESTAD – E gastonan di personal extra cu gobierno anterior a surpasa riba e tereno di personal den 2017, ta loke specificamente gobierno kier sa di Algemene Reken Kamer (ARA), pa sa si aki a haci algo ‘illegal’ y si ta asina, denuncia esaki penalmente. Riba pregunta di NoticiaCla a puntra kico specifico Gobierno tin, cu ta pone nan bisa esey. Premier Wever a contesta pues cu nan tin informacion cu gobierno anterior lo a tuma un cantidad di hende na trabou sin cu nunca nan a aparece na pia di trabou, pero cu lo a wordo uza pa campaña y cumpra y haya voto pa e partido berde. Tambe e compania cu a ‘nace’ cu yama Social Pop, pa mercadea AVP usando fondo di gobierno. Segun Wever, ta kere cu den tres luna di tempo, ARA lo mester ta cla cu e rapport aki.

INVESTIGACION ARA

Ayera NoticiaCla a bin cu e primicia riba e intencion di gobierno actual pa laga ARA investiga e cuentanan annual y saca afor posibel irregularidadnan. Awe a splica mas detaya riba e proceso. Segun ley, Wever a splica, ARA ta investiga e cuentanan annual di gobierno y wak si enberdad e gastonan haci, ta corecto y legal. Esey ta nifica cu ta bay wak si gobierno a gasta placa pa mercadea gobierno su proyecto, si tin recibo cu ta sostene e accion ey. Tambe ta wak si tabatin un decision di conseho di minister cu ta aproba un mandatario pa a haci tal gasto. Tambe ta check si e compania cu a haya e oferta, a haya esaki di un forma corecto, of si e no a bay di forma corecto. “Naturalmente no ta bay haci’e riba cada gasto, pero en general. Nan ta bay yega na un conclusion cu p.e. e ministernan a surpasa nan presupuesto pero cu tabatin un decision di ministerraad cu ta legitima e gasto ey. Si no tin esey, e ora e por bira un castigo penal pa e minister responsabel.

DEN PASADO

A duna un ehempel con den pasado DOW a surpasa presupuesto cu bastante placa na 2013 y 2014, y no tabatin un decision di conseho di minister pa legitima e gasto. Esey a bira un decision ilegitimo. Esey a bin Parlamento e tempo ey, pero e tempo ey e mayoria den Parlamento tabata na fabor di gobierno di AVP y a aproba esaki despues y a legitima esaki. Aworaki e situacion ta diferente. Si aworaki constata cu p.e. ex minister Benny Sevinger a surpasa su presupuesto cu 1000 y un porciento, ta e Parlamento actual tin cu dunele e legitimidad of no. Tambe ta bay check gasto di personal cu a subi considerablemente. Ta wak si esaki ta den cuadro di maneho, si e tabata eficiente y si e hendenan aki a aparece na trabou. Cu MFA tambe ta bay check e suma halto di den presupuesto. Kico sali di e rapport, ta bisa p.e. cu a surpasa e presupuesto cu un cierto suma, pero di esey tin decisionnan di ministerraad cu ta aproba esaki. Si yega na un conclusion sin hustificacion, por tuma dos paso. Uno ta sea bay Parlamento pa legitima esaki of no, of ta haci un denuncia na Ministerio Publico.