Tjin-Asjoe: Diamars a informa Team Aruba cu a cancela contract

ORANJESTAD - Diamars ultimo Aruba Tourism Authority a informa Team Aruba oficialmente cu nan contracto ta keda cancela. Asina e CEO Ronella Tjin-Asjoe a confirma pa NoticiaCla diahuebs. Asina ta kita tur confusion cu a surgi for di diamars ora cu e director di Team Aruba Ven Eman a informa ainda cu nan no a haya ningun confirmacion di un cancelacion. Sinembargo algun rato despues minister di Turismo Dangui Oduber a sigura e portal aki cu no tin contracto mas. Y mas anochi un comunicado di ATA tambe a bisa esey. Pues a keda e interogante, di ken ta papia berdad. Segun Tjin-Asjoe, posiblemente ora di e conferencia, Team Aruba lo no a ricibi e carta ainda. "Mi a firma e carta diamars y e carta a bay diamars" Tjin-Asjoe a sigura e portal aki. 

VERSION TEAM ARUBA

Tabata durante e conferencia di prensa di Team Aruba diamars atardi, nan a informa cu nan ta sigui cu e programa di auto di careda. Asina Eman a bisa e momento ey. Team Aruba a sigura e momento ey cu na niun momento a wordo notifica officialmente cu e programa ta yega su fin, despues cu e Board di ATA mes a duna goedkeuring y positief advies pa sigui cu e programa." Nos no por bay a base di noticia nan expresa den social media". Asina Eman a sigui bisa durante un conferencia di prensa diamars atardi. Ademas a desmenti cu a pidi ATA pa cumpra un auto nobo. Segun Trevor Eman driver di Team Aruba, yiu di Ven, nan a tende si di e purchase order pero esaki ta un fout. Unda e fout ta, nan no sa. Pero no ta e berdad cu nan a pidi pa cumpra e auto. 

VERSION MINISTER

Despues di e conferencia, ora cu e portal aki a acerca e mandatario di Turismo, e la declara “Ningun momento mi a duna ni Ven Eman ni Team Aruba ningun indicacion cu e sponsorship di team Aruba lo sigui”. Eman a bisa NoticiaCla cu a papia cu e mandatario y cu ningun momento tabatin indicacion cu e sponsorship lo a para y cu e no a haya ningun notificacion oficial. Segun Oduber sinembargo, tabata na NoticiaCla mes el a bisa cu e sponsorship no ta sigui.

VERSION ATA

E situacion a bira mas interesante na final di diamars, ora cu ATA mes a manda un comunicado, confirmando declaracion di Oduber riba e cancelacion di contracto. Segun e comunicado, ATA a bisa cu nan a tuma nota di diferente publicacion referente aporte pa cu Team Aruba. A tuma nota di diferente discusion cu a surgi rondo di e topico aki y di e hecho cu a combina e topico aki cu diferente otro pensamentonan referente maneho di A.T.A. A.T.A. no ta opta pa drenta den discusionan cu ta considera di tin indole politico, pero sinembargo a dicidi di pa medio di esaki, aclaria lo siguiente, sperando cu e ta brinda claridad na un manera imparcial: Patrocinio Team Aruba no ta continua A.T.A. a base di decision di Minister di Turismo, cu nos ta consiente cu Minister a indica publicamente tambe, no ta continua cu aporte pa cu Team Aruba entrante 2018. E ora a keda e pregunta, ken ta confundi, pa no bisa 'ken ta papia berdad'. Pero cu e declaracion di ATA, esaki ta posiblemente keda clarifica.