Nomber di director nobo di aeropuerto Beatrix ta conoci

ORANJESTAD – Entrante 1 di Augustus e persona cu lo probablemente maneha nos aeropuerto Reina Beatrix ta un stranhero, cu ta trahando actualmente como un hefe na e terminal di JFK na New York. E mandatario encarga cu aeropuerto, Otmar Oduber a uza e palabra ‘practicamente’ pasobra tin 2 persona den contienda. Un di e personanan ta conoci, y ta James Fazzio y muy probablemente e persona aki lo bira e proximo director. Oduber no kier a confirma cu ta e persona aki pero e ta esun cu mas probablemente lo haya e trabou. E la topa cu e mandatario caba na luna di mei, y e otro a topa cu e mandatario luna pasa. Entre e dos personanan aki e ta. Pero mes momento na dado momento Oduber tabata referi na ‘e persona’ y ‘mi a reuni cu e persona cu a opera na e aeropuerto na JFK’. Pues e ta e persona mericano cu lo funciona den un constelacion nobo cu a cumbini cu Schiphol Group caba.

E acuerdo nobo cu entre AAA NV y Schiphol Group tin cu wordo formalisa mirando cu esun ‘bieu’ a vence. Ta trata di un acuerdo pa e proximo 25 anja den cual tin hopi cambio aden. Entre nan tin planifica cu gobierno lo cuminsa cobra pa varios di e servicionan pa asina haya entrada pa por cubri gastonan di aeropuerto. E dos personanan cu ta den ‘bullpen’, Giovanny van Wijk y Jurgen Benschop, -ambos gerente halto na aeropuerto caba- , lo tin cu warda algun aña ainda prome cu nan ta cla. Oduber a mustra cu ta e deseo pa tin hendenan local pa e funcion. “Nos tin hopi hende adecuado y sigur dos pa tres hende cu tin e capacidad cu un poco mas training den e añanan benidero, lo ta cla pa por tuma e timon di nos aeropuerto cu e conocemento y blessing di Schiphol’.