Polis den caso Zinnia Croes no a apela su sentencia

ORANJESTAD – E agente policial Jadira Vriend ,-cu recientemente a keda sentencia den e caso di morto di e hobencita Zinnia Croes -, no a apela su sentencia ricibi. Vocero di ministerio publico Ann Angela a confirma esaki pa NoticiaCla diaranson atardi. Esey kiermen cu e sentencia manera duna pa e huez, ta bira ‘irevocable’. Informacion cu NoticiaCla tin, ta cu esaki por tin consecuencia pa e polis su futuro como polis.

E SENTENCIA

E sentencia dicta dia 5 di juli ultimo ta bisa cu Jadira Vriend tin cu cumpli cu 240 ora di trabou comunitario y ta perde su rijbewijs pa 2 aña y ta haya un proeftijd di 2 aña. Si e viola e sentencia of parti di dje, e tin cu bay cera den prizon.

MAYORNAN

Mayornan di e hobencita dia cu huez a dicta e sentencia a bisa NoticiaCla cu nan ta satisfecho cu e sentencia, den sentido cu huez a haya e polis culpabel y no Zinnia. Nan tabata prepara pa e sentencia aki, y ‘por biba cu ne’.

CONSECUENCIA

Informacion cu e portal aki a logra obtene ta mustra cu den e caso aki, LMA lo ta papia di retiro na momento cu un sentencia ta bira irevocable y den cual sentencia tin castigo di prizon. Vriend a haya castigo di prizon den caso cu e no cumpli cu e taakstraf. Ademas Vriend ta bira suheto na un daño di perhuicio si e famia di e fayecida demande den un caso civil. Y ta conoci cu den un demanda civil no tin plafond pa un daño di perhuicio. Di otro banda, e siman cu a pasa, minister di husticia Andin Bikker a splica NoticiaCla cu e ta wardando riba e conseho di Dept. di Recurso Humano (DRH) pa wak kico mas por haci cu e polis pa cu su castigo discplinario. E momento ey Bikker a bisa cu si ta p'e, e polis mester haya e castigo maximo disciplinario, cu kiermen retiro di trabou. Pero e conseho final no a drenta ainda segun e portal aki a compronde.