Grupo di mayor cu ta nenga vacuna pa nan yiu, ta creciendo

ORANJESTAD – Pa evita cu brote di sarampion y difteria no pasa di Venezuela pa Aruba, e grado di vacuna mester ta riba 90%. Pero un grupo grandi di mayor ta nenga ripiti vacuna. E dama Valerie* a scoge, concientemente hunto cu su casa pa no duna nan dos yiunan vacuna. Den pasado e la traha cu muchanan autista y a tende storia di e mayornan di e impacto cu e vacuna BMR tabatin riba nan yiunan. Ademas e tabatin un cuna cu a haya keintura halto despues di un vacuna. El a cuminsa su propio investigacion, cu a resulta den informacion y experiencia negativo cu a conduci pa e no vacuna su yiunan.

MIEDO PA EFECTO SECUNDARIO

E docter di mucha Jan Hubert cu ta encarga cu e programa di vacunacion na Aruba, a conta cu e isla tin masha poco mayor cu ta dicidi pa no vacuna nan baby. Ta trata di entre 10 pa 20 baby pa aña. Loke si ta sosode ta cu DVG (Dept. di Salud) ta mira cu un cantidad creciente di mayornan no ta laga nan yiunan di 10 pa 11 aña, haya mas vacuna. Pues e grado di prome vacuna ta 98% mientras cu e di dos vacuna ta na 93 pa 94%

Mayornan, tanto esnan di educacion halto como menos ta preocupa cu e efectonan secundario. “Nan ta tende cu vacuna no ta bon pa nan yiu y cu nan ta haya tur sorto di trastorno cronico of neurologico. Solamente cu e miedo pa e efectonan secundario no ta cuadra cu esaki ta desaroya autismo, segun Hubert. Efectonan secundario manera keintura, y dolor na lugar di infeccion ta comun. Pero un malesa cronico cu ta aparece y afecta e salud di un mucha, no ta existi.

MIEDO PA BROTE DI VENEZUELA

Departamento di Salud ta preocupa cu e caida di porcentahe di cobertura na Venezuela, aunke e no ta un menaza directo pa comunidad (di Aruba). E preocupacion ta bin debi na e situacion na Venezuela unda cu tin diferente tipo di malesa di infeccion manera sarampion, difteria y tambe te hasta polio. “Nos no ta den e zona di peliger. Pero toch bo ta mira mayornan bisa cu nan no kier e vacuna. Si dado momento bo ta mira un ‘trend’ pa no laga vacuna bo yiu y e porcentahe baha na 80 pa 85%, e ora bo por bisa dado momento cu ta trata di un brote” Hubert a bisa.

EXTRA ATENCION DEN AÑA ESCOLAR NOBO

Direccion di Salud ta bay pone mas atencion den e aña escolar riba e importancia di vacuna. Segun Hubert, ta importante pa sigui haci esaki. “Nos no ta prik e muchanan pa pret. E motibo ta cu nos kier combati malesa di infeccion. Y no pa e mucha so, sino tambe pa esnan mas vulnerable den comunidad, cu pa via di esnan vacuna, ta wordo protegi”.

NOTA: E nomber di Valerie ta falso pa su proteccion y e nomber real ta conoci pa redaccion.

Fuente: Caribisch Netwerk . Autor Bobby Spier