Oduber na NoticiaCla: ‘E sponsorship aki (Team Aruba) no ta sigui!’

ORANJESTAD – “Ningun momento mi a duna ni Ven Eman ni Team Aruba ningun indicacion cu e sponsorship di team Aruba lo sigui”. Asina minister di deporte Dangui Oduber a bisa NoticiaCla diamars atardi, reaccionando riba e conferencia di prensa di Team Aruba. Durante e conferencia Ven Eman, director di Team Aruba a bisa NoticiaCla cu a papia cu e mandatario y cu ningun momento tabatin indicacion cu e sponsorship lo a para y cu e no a haya ningun notificacion oficial. Segun Oduber sinembargo, tabata na NoticiaCla mes el a bisa cu e sponsorship no ta sigui.

SPONSORSHIP

“Tabata 2 siman atras caba cu durante un entrevista exclusivo cu e portal Noticiacla mi a bisa enfaticamente cu e sponsorship aki no ta carga mi aprobacion y no lo continua” Oduber a bisa e portal diamars. Segun e mandatario, el a splica na placa chikito cu argumentonan valido pakico e no ta kere den e sponsorship aki. “Berdad ta cu Ven Eman a busca di tur manera pa haya un cita y nunca mi a topa cu Ven Eman personal” e mandatario a sigui bisa. “ Mas bien mi ta kere cu e la contagia cu e malesa di gañamento di su ruman Mike Eman pasobra mi tabata hopi cla den mi splicacion pakico e sponsorship aki no ta continua” Oduber a bisa.

NO TA SIGUI

“ En todo caso, pa ta hopi cla, e sponsorship aki no ta sigui. E no ta forma parti di mi maneho como minister di turismo y no ta fit den mi vision tampoco” Oduber a continua bisando. E mandatario a bisa cu e ‘nunca mi a kere den e return on investment di e sponsorship aki y no tin ningun balor agrega pa nos turismo’. “E fondonan aki lo wordo inverti na un mihor forma caminda no famia Eman lo mira e beneficionan sino turismo den su totalidad!” e mandatario a finaliza su reaccion breve na NoticiaCla.