Eman: Minister lo a indica cu sponsorship pa Team Aruba ta sigui

ORANJESTAD – Minister di turismo Dangui Oduber lo a duna indicacion na director di Team Aruba Ven Eman te cu 4 siman atras ainda, cu e proyecto di sponsorship ta sigui. Asina Eman a bisa diamars atardi den un conferencia di prensa. Riba pregunta di NoticiaCla, Eman a splica cu tabata e tempo ey ainda el a papia cu e mandatario. “E minister kier a papia cu mi” Eman a bisa NoticiaCla. “E di cumi ‘Ven, e co ki no ta bay tin niun politica aden. Mi conocebo mucho tempo. Mi sa kico bo ta haci’” Eman a bisa, indicando cu tur cos lo a bay bon. Esey tabata e ultimo combersacion entre Eman y Oduber. “Y djey all of a sudden, fireworks!” e director a bisa refiriendo na e cambio diripiente di e bay bin den media riba e cancelacion di contract di Team Aruba. Eman a mustra cu esaki tabata indicacion cu sponsorship ta sigui. Te ainda, nan no a haya ningun notificacion oficial cu e sponsorship a cancela.

PLAN B

Segun Trevor Eman, e coredor di e auto di Team Aruba, si dado caso mes resulta cu e sponsorship oficialmente no sigui, nan ta sigui toch. “Nos lo busca un forma” (Trevor) Eman a bisa, mustrando cu ta mucho leu nan a yega awor pa e team back out. A splica cu nan a haya un di e 10 invitacionnan pa participa na e caredanan di mas grandi di drag cu ta na Indianapolis di NRA, y no participa y nenga e invitacion, lo ta un falta di respet. Pues si dado caso mes no haya fondo, nan lo wak con nan lo hacie, y lo sigui hacie pa Aruba e dos pa tres careda cu nan tin cu participa awor cune. Scucha e entrevista AKI.