Aruba ta logra 9 medaya na Campeonato di Caribe na Corsou

ORANJESTAD – Karatekanan di Aruba a bolbe Aruba cu 9 medaya di Caribbean Karate Championship Curac?ao 2018’. Na e campeonato aki, Aruba a confronta Trinidad & Tobago, Cayman Islands, Santo Domingo, Corsow y Boneiro. Hunto, e karatekanan Maresha Tromp, Janilaine Bello, Silvana Agudelo, Keven Prada, Alejandro Gonzalez Lujan y Kevin Lugo a trece 9 medaya (2 oro, 5 zilver, 2 brons) pa Aruba. E karatekanan ta contento cu nan prestacion. Nan experiencia na Corsow ta duna nan extra motivacion pa sigui cu mas animo padilanti.

Assistantcoach di Aruba Karate Bond, ‘sensei’ Lucio Alberto Gonzalez ta satisfecho cu e trabou di e karatekanan. E ta kere cu cada un a haci nan maximo esfuerzo. Mas cu claro, e ta realisa su mes tambe cu mester sigui traha duro pa por yega mas leu. E caminda ta largo pero sigur no imposibel. Ta wak ora bo ta participa den exterior cu e nivel di competencia ta halto. Mester haci uzo di e oportunidadnan aki pa sigui haya mas experiencia, mas ‘fogeo’.

Otro persona contento cu e prestacion di e karatekanan di Aruba ta ‘Sensei’ Felix Tromp, presidente di Aruba Karate Bond. Su persona a haci uzo di e oportunidad na Corsow pa reconecta cu tur organisacion di karate presente y intercambia ideanan pa proyectonan nobo. A gradici ‘sensei’ William Millerson, vice-presidente di ‘World Karate Federation’ pa su invitacion y apoyo cu su persona ta dunando Aruba.