Universidad di Aruba no ta haya tereno Colegio Bonifacius

ORANJESTAD – Universidad di Aruba tin cu busca un poco mas pa un lugar pa expande, awor cu a dicidi cu nan no ta haya e tereno di Colegio Frère Bonifacius. Awor cu e tereno unda cu a benta edificionan di Colegio Frère Bonifacius ta keda pa e scol mes, Universidad di Aruba mester busca pues otro lugar pa por ‘expande’. Un tereno cu posiblemente lo por uza ta na Post Aruba, cu no ta wordo bon uza mas. Asina e mandatario di enseñansa a bisa dialuna mainta. Universidad di Aruba tabata un di e interesadonan pa haya e tereno, pero finalmente a dicidi otro.

COOPERACION AINDA

Lampe sinembargo no ta descarta cu ainda por tin un tipo di cooperacion pa loke ta un pida di e tereno aki. “Ta depende con e negociacion ta bay cu Bisdom Willemstad, unda cu por (riba e tereno) aloca un laboratorio chikito. Pero esey ta den proceso” Lampe a bisa. Aworaki sinembargo, e tereno di Bonifacius ta pa e scol mes. “No pa universidad di Aruba”. E scol tin miras si den e becindario riba diferente opcion. Entre otro a haci mencion riba e edificio di Post Aruba. “Esey por ta un opcion cu nos lo wak den e proximo lunanan den forma di cooperacion, pasobra e universidad mester di mas espacio” Lampe a finaliza bisando.

HISTORIA Universidad di Aruba a cuminsa na 1988 y awe ta conta cu 700 studiante cu 4 facultad, Ley, FEF, Hospitality y Turismo, y e ultimo FAS (Arte y Ciencia). Nan ta chikito awor y mester expande pa por ofrece mas servicio y por atende mas alumno. E rector actual ta dr Glenn Thodé. Potret cortesia Hans Ruygt.