Lo reconstrui Colegio Frère Bonifacius riba nan tereno ‘bieu’ mes

ORANJESTAD – E scol Colegio Frère Bonifacius mester a bloed dood. Asina minister actual di enseñansa Rudy Lampe ta kere cu tabata intencion di e gobierno anterior. Decision a cay sinembargo cu e scol ta haya bida bek y ta cuminsa reconstrui e scol den un edificio nobo riba e mesun sitio di e scol. Lampe dialuna mainta a duna mas informacion riba e desaroyo di e scol, despues cu diabierna a cuminsa cu trabou di demolicion di e edificionan cu tabata ‘afgekeurd’. Segun e mandatario actual, e cantidad di studiante cu ta bay e scol (pa 6 aña caba ubica awor na edificio di VAD), a baha drasticamente di 300 te na 130. “Si nos keda un aña mas asinaki, e scol lo keda bou di 100 studiante y e ora mester sere” Lampe a bisa.

RESPONSABEL

Esun finalmente responsabel pa e scol, y ta doño di e tereno ta Bisdom, Obispo di Willemstad y e la indica cu e kier pa e scol keda na Playa. Pues e ta bira mas cu logico cu e reconstruccion lo mester tuma lugar na e tereno mes. Lampe a sigura cu e tabatin un skypegeprek cu obispo Secco, pa cu e plannan. E intencion ta e scol bira e prome ‘smart school’ na Aruba, banda cu ya ta trahando riba e smart community na Kibaima. “Nos lo kier pa tur e knowhow pa un smart initiative bay eynan y asina e bira e scol di futuro. Nos ta spera cu por pronto por keda cla y door cu ta trata algo nobo, e ta bay exigi un tiki mas tempo” Lampe a sigui bisa. E ta spera cu durante e aña escolar nobo e scol keda cla cu e esaki lo ta e ultimo aña escolar cu e scol ta ubica unda cu nan ta aworaki.