Pais Aruba porfin a cuminsa traha riba e R.O.P. y R.O.P.V. nobo

ORANJESTAD – Pa otro aña Aruba porfin tin su ROP (Ruimtelijk Ontwikkelings Plan) nobo, y su ROPV (Ruimtelijk Ontwikkelings Plan met Voorschriften). Por lo menos esaki ta e intencion si tuma nota cu siman pasa gobierno a inicia trabou di revision di locual ta ensera e ROP y inicio di e prome fase pa creacion di ROPV. E ROP actual ta vence na 2019 (Esun actual a drenta na vigor na mei di 2009 y tin un duracion di 10 aña) pa cual mester bin un cambio aden y ta acomoda entre otro e proteccion di 16 area riba Aruba . Gobierno a informa dialuna cu el a cera un acuerdo cu consultantenan di RHO adviseurs Rotterdam cu ta un compania cu ta enfoca riba desaroyo teritorial y calidad di bida.

VARIOS REUNION

E consultantenan ta na Aruba actualmente sintando cu diferente departamento pa ricibi informacion pa cuminsa cu e fase di exploracion. E intencion ta pa crea un proceso inclusivo unda cu ta siña di diferente perspectiva, pa combina esakinan hunto pa por crea un plan cu ta representa e interes di diferente grupo pa locual ta desaroyo teritorial. No a bisa pa ki tempo esaki lo keda cla pero ta premira cu den e prome cuartal di otro aña por spera esaki. Unabez cu e ROPV ta cla, e lo ta valido pa un periodo di 5 aña.

HISTORIA DI ROP

Ta for di tempo cu Aruba tabata forma parti di Antias, tabatin deseo pa bin cu ley pa regla e desaroyo teritorial di e isla. Desde Aruba su status aparte na 1986, a prepara varios concepto di ley sin cu esaki a conduci na un ley mes. Tabata na 1994 cu e prome publicacion a aparece cu e concepto LRO1 (Landsverordeing Ruimtelijke Ontwikkeling1) . Despues na 1996, fraccion di MEP den Parlamento a presenta un concepto pa bira ley. Despues gobiernonan mes tambe a presenta un concepto y tabatin hopi conseho riba e tereno. A base di e consehonan, a bin e concepto Landsverordening Ruimtelijke Ontwikkeling y a test esaki riba tur aspecto legal y procedural y unda cu e ‘trekkernan’ di e ley a presenta un nota di cambio. Un instrumento importante cu e LRO ta ofrece, ta e ROP. Esaki ta consisti di un descripcion di e desaroyo teritorial mas desea. Finalmente na September 2005 parlamento a aproba e LRO. Na mei 2006 Conseho di minister a aproba esaki y a anuncia esaki como LRO na October di 2006. Finalmente na Mei 2009 e ley a keda aproba y a bira vigente pa 10 aña y ta vence na mei 2019.

.