OM: No por a sigui detene e homber cu a ‘masturba den publico’

ORANJESTAD – Pa straño cu por zona, e homber cu recientemente a wordo gara (riba video) ta masturba den publico, no por keda deteni mas tempo, prome cu su caso bin dilanti. Asina vocero di ministerio publico Ann Angela a confirma dialuna pa NoticiaCla. E acto pa cual e homber ta wordo sospecha di dje, tin un castigo di menos di 4 aña di prison mara na djey. Y pa e motibo ey, no ta sigui detene detene e homber te ora cu e caso bin dilanti. Segun Angela, e homber ta wordo sospecha di ‘violacion di decencia’, pa cual tin un castigo di prison di un aña ‘so’. Y pa castigonan menos cu 4 aña di prison, no ta tene un hende deteni te ora cu su caso bin dilanti. Den e caso aki, ni si ta trata di un persona cu a haci loke e la haci, esta expone su mes publicamente.

BIKKER

Tabata dialuna mainta cu minister di husticia Andin Bikker a duna un ‘update’ riba e caso aki cu a bin na luz di dia siman pasa. Segun e mandatario, el a confirma cu e homber en cuestion a keda deteni berdad, pero mientrastanto ya ta den libertad caba. El a wordo gara ‘buiten heterdaad’, esta fuera di e acto ora cu polis a yega. A interoga e persona y despues a resulta cu e famia no kier a entrega un keho. Como tal e ora OM a dicidi di laga e persona bek den libertad. “Pero nos a haya un reaccion di indignacion corectamente di comunidad” Bikker a bisa, di e hecho cu e homber ta den libertad caba. Pero Bikker a sigui splica cu segun ley, si no bo un keho y cu si polis no a gar’e den e acto, e pasonan cu bo por tuma ta limita. E mandatario a sigura tambe cu como minister, e no por bisa OM kico pa haci, pasobra OM ta actua segun codigo penal. Nan ta sigui e maneho si di e mandatario, pero no cu e mandatario por mete y bisa OM kico pa haci den casonan individual. Loke por haci, ta cambia e leynan y haci e castigonan mas pisa, manera e.o. e ley minimo cu a keda sugeri, pero no ta mucho popular cerca hueznan.

VIDEO

NoticiaCla a puntra e mandatario cu mientras cu polis berdad no a gara e homber ‘den e acto di masturbacion publico’, e realidad ta cu tin un video cu a circula como prueba y cu si esey no por ta suficiente prueba cu a homber a haci e loke e ta wordo acusa di a haci. Riba esaki, Bikker a contesta e portal aki cu ta abase di e video, polis a bay over pa detene e persona, aunke cu no tin un denuncia haci. “Pero tin indicacion cu lo tin otro actonan cu lo a tuma lugar. Y di e actonan ey no tin un aangifte” Bikker a sigui bisa. A bisa e ora cu na final di dia, OM ta esunnan cu ta tuma decision kico ta haci of no. Y ta aki Bikker a referi e portal aki na e vocero di ministerio publico.